Nagpalit ka diay Kadyo og pistola .38 sa imong amigo sa Danao?” pangutana dalang hunghong ni Teray ngadto sa iyang bana usa ka kaadlawon niana samtang naglimpyo ang iyang bana niini.
“Hinaya nang tingog mo giandam ko ning Osting nga pwerting gahia’g ilong nga badlongon nga ipalayo gyud nang iyang kanding ug baka aron dili masabsab o mapahak nang atong kamaisan sa uma,” tubag ni Kadyo nga padayong limpyo sa armas.
Tubag ni Teray sa hinay’ng tingog, “Unya kun masakpan ka ana aber dako ra ba na’g pyansa ug hasol pa kaayo.”
Gagmay pa ang mga anak nila ug si Kadyo maoy nagtikad sa ilang uma samtang si Teray namuhi og mga kahayopan sama sa mga manok ug baboy.
“Kadaghan na nako gibadlong si Osting nga ipalayo og tugway ang iyang mga kanding ug baka gikan sa atong uma apan sige lang gihapon. Makaloluoy ang atong kamaisan ug uban pang mga tanom,” pahayag pa ni Kadyo.
“Hoy Kadyo hiposa na nang butanga kay makita unya na sa atong mga anak,” pahimangno pa ni Teray.
Pagkabuntag samtang nagpatuktok si Kadyo sa manok niyang buyogon, maoy nalantawan niya si Osting nga nagtugway sa iyang baka ug kanding duol sa iyang kamaisan.
Dali dayong misulod si Kadyo sa ilang balay ug hilom niyang giluklok ang iyang armas sa hawak ug dayong duol kang Osting.
“Unsa gud ni Pare Osting gahi man jud kang musabot mahurot nang mga tanom ko og kaon sa imong mga hayop!”
Wala pa gani makatubag si Osting gipusil dayon siya sa ulo ni Kadyo.
Nahagba sa yuta si Osting ug nabugtoan sa kinabuhi atol usab sa paghilabay ni Basyo nga namukot gikan sa dagat.
Pilay estorya, napriso si Kadyo ug nasentensiyahan sa hukmanan sa bayente anyos ka pagkabilanggo ug sa pagbayad og danyos balig usa ka gatos ka libo ka pesos ngadto sa pamilya sa biktima. “Nagbasol na ko Teray sa akong nahimo,” namulong si Kadyo ngadto sa iyang asawa. (Kataposan)