Nahimuot si Joshua nga nagsud-ong sa bag-o nilang balay. Iyang gipatukod sa barangay Cotcoton alang ni Papa Victor ug Mama Gina niya. Ug maoy ilang kapuy-an uban sa iyang asawa matag bakasyon nila dinhi sa Sugbo.
Samtang nagpaabot si Joshua sa pari nga mobendisyon sa balay, misibog iyang hunahuna sa nangagi.
“Sayang sa imong ambongang dagway, Brod Joshua, bati ma’g nawong ang imong gipangasawa,” hangop nga komedya ni Eking nga gikahimut-an sa iyang mga barkada.
“Napul-an na man gud ko anang mga gwapa, Brod Eking,” paundayong komedya ni Joshua sa iyang barkada.
Mao nay ilang komentaryo ni Joshua sa dihang miabot silang magtiayon sa ilang barangay sa Lokon upat ka bulan nga milabay. Sa ilang pag-inom kauban sa iyang mga barkada gikataw-an siya. Dili sila makadawat sa nahitabo ni Joshua. Si Joshua maoy giila nga Piolo Pascual sa ilang barkada ug sa ilang barangay.
“Brod Joshua, kaming lima nga barkada mo, di pareho nimong gwapo, pero gwapa’g asawa. Kun ako’y pareho nimo’g nawong, artista akong pangasaw-on,” pasiatab ni Benjie usa sa iyang barkada.
“Wa koy mahimo, mao may akong kapalaran,” tubag ni Joshua.
Maoy kanunay nga sumsuman sa mga barkada ni Joshua ang nahitabo sa iyang kaminyuon. Busa nakahukom siya nga sa barangay Cotcoton magpatukod og balay aron makalikay sa sungog. Napakgang ang paghanduraw ni Joshua sa nangagi dihang gipahibawo siya sa iyang asawa nga nangabot ang mga bisita ug pari nga mobendisyon sa bag-o nilang balay.
Human sa makabungog nga paniudto gipasalamatan ni Joshua ang tanang mitambong sa okasyon.
“Salamat kaayo sa inyong pagtambong. Akong ipaila kaninyo si Mila, akong asawa,” nakita ni Joshua sa panagway sa mga bisita ug sa iyang barkada nga nangatawa. Ug mipadayon si Joshua. “Sa iyang tupad, si Don Vicente, akong ugangan, tag-iya sa V Shipping Lines,” pakigpulong ni Joshua nga nakapakaging sa tanang bisita. Ug si Joshua mao na sab ang mikatawa. (Katapusan)