Dear DJ Inday Misyel,
Ako si Rose, 19 years old. Pangandoy nako nga mahimo’ng radio announcer sama sa mga sikat karon nga DJ's. Magsige lang ko og paminaw sa mga paborito nako nga estasyon ug music lover g’yud ko. Unsaon man nako nga mahimo ko nga radio announcer? Ingon sa akong mga friends nindot kuno ko og tingog ug maayo ‘sab ko mosulti. Sayon ra ba ang pag-apply? Nag-eskuwela pa man gud ko, unya bata pa, qualified ba kaha ko? - Rose
Dear Rose,
Tingali, kun nindot ka og tingog ug maayo manulti, plus factor kana nga qualified ka nga mahimo’ng radio announcer. Kun mo-apply ka sa kinaham nimo nga FM stations mahimo nga mo-submit ka sa imong recorded adlibs. Mahimo ‘sab nga adto ka sa radio station actual ka nga i-undergo og audition. Daghang radio stations karon nga kulang og mga DJ’s kay ang uban ilisan tungod kay wala mo-click ang ilang programs. Panahon sa audition be unique, ayaw kopyaha ang estelo sa ubang DJ’s. Praktis daan sa imong mga adlibs, read newspapers and books and be unique kun anaa na ang kahigayonan. - DJ IndayMisyel/09995894692
INTIMATE MOMENTS Rosalie V.
Jezebel
Gula 91
Si auntie Freda lang ang gilauman kong kadangpan sa Cebu.
Dihang nagabii na, kalit may lalaking miduol nako. Mipahiyom ang lalaki dihang ako siyang gitutokan.
“Ayaw kahadlok,” niya pa, “dili ko dautang tawo.”
Wala ko motingog. Nagpadayon ko pagtutok niya.
“Dili ka taga Cebu, no?” sukit sa lalaki.
“Oo,” mubo kong tubag. “Taga Bohol ko.”
“Diin sa Bohol? Taga Bohol man sab ko. Sa Tagbilaran ang amo.”
“Sa Mabini ang amo.”
Nagpaila siya sa iyang kaugalingon nako. Laurence ang iyang ngalan. Gitug-anan ko sab siya sa akong ngalan.
“Nganong naglakawlakaw pa man ka ning orasa sa kagabhion?” Pangutana ni Laurence.
“Wa man ko’y kadangpan dinhi sa Cebu. Ang akong iyaan wa na man sa iyang gipuy-an sa Banawa.”
“Wa diay kay kauban?”
“Nag-inusara ra ko pag-anhi sa Cebu.”
“Delikado ra ba dinhing dapita, Jezebel, labi na’g wa kay kauban.”
“Bahala na lang ni. Unsaon nga wa man ko’y laing kadangpan.”
“Tabangan tika. Ihatod ko ikaw sa presinto sa kapolisan. Maayo didto kay safe ka. Ayaw na’g suroysuroy kay tingali’g tripingan ka sa mga adik.” -- Sumpayan pa