Nasagmuyo ko sa akong nadiskobrehan. Si auntie Freda ray bugtong kong kadangpan sa Cebu. Apan gidemolis na akong kabalayan sa dapit nga ilang gipuy-an.
Wala ko’y ideya kun hain mobalhin og puyo ang akong iyaan uban sa iyang pamilya.
Nagsusi ko’g maayo. Nagpangutana ko sa mga tawo nga nagpuyo dili layo sa dapit diin gihimo ang demolisyon. May nakatudlo nako sa dapit nga may gihimong relocation site sa tanang naigo sa demolition. Giadto nako ang maong dapit sa pamasin nga atua usab didto mobalhin og puyo ang akong auntie.
Apan wala didto ang akong auntie. Sumala sa mga tawo nga akong gikasulti, milalin na diay og puyo sa laing dapit si auntie Freda sa wala pa mahitabo ang demolition. Pero wala’y nakatudlo nako kun hain mobalhin og puyo ang akong iyaan.
Mibalik ko sa downtown nga huyhoy ang abaga. Wala ko masayod kun unsay sunod nakong buhaton. Wala na koy plano nga mobalik ngadto sa Bohol. Naguba na ang among pamilya. Nalambigit sa dakong eskandalo ang banay namo ni Edward. Maulaw na kong magpakita sa mga tawo sa among dapit.
Naglatagaw ko sa siyudad nga wala’y tumong. Bisan asa lang ko dad-a sa akong mga lakang.
Namasin ko nga may milagrong mahitabo ug magkasugat kami si auntie Freda sa dalan. -- Sumpayan pa