Gula 89
Nakaseguro kong masilag si Edward kanako sa higayon nga iyang masayran nga gipatay sa akong amahan ang iyang amahan. Posible pa gani nga ako’y iyang panimaslan.
Busa karon pa lang gani, gitun-an ko na ang akong kaugalingon sa paghikalimot kang Edward.
Sakit alang nako ang pagbuhat niini tungod kay gimahal ko siya. Gani gikatugyan ko na man sa makadaghan ngadto kaniya ang akong pagka-babaye.
Apan kinahanglan kalimtan ko siya aron paglikay sa posibleng mas grabe pang suliran sa umaabot. Dili na ko gustong magkakita pa kami pag-usab si Edward.
Dungan sa pagbiya nako sa among dapit, hingpit na usab akong nahilayo kang Edward. Nakaseguro kong dili na ko niya handumon.
Ug tingali, mahikalimtan ko ra siya sa ngadtongadto. Ug ang nahitabo kanamo sa makadaghan mahimo na lang tipik sa kagahapon nga angay nang ilubong sa kalimot.
Pagdunggo sa Ocean Jet nga akong gisakyan sa pier sa Cebu, misakay ko’g taxi paingon sa Banawa. Gidumdom nako ang dapit nga gipuy-an nila ni auntie Freda. Gusto kong masayod dayon ang akong iyaan sa nahitabo ni tatay didto sa Bohol.
Apan sa akong pag-abot sa dapit nga maoy gipuy-an nila ni auntie Freda sa Banawa, kahaw-ang ang misugat nako. Nahanaw na ang maong dapit. Wala nay kabalayan kay gidemolis. Nalakip sa pagdemolis ang balay sa akong auntie. -- Sumpayan pa