Gula 88
Nabalhog sa bilanggoan si Tatay Metodio kay misurender man siya ngadto sa mga awtoridad human niya mapatay ang tatay ni Edward.
Karon pa ko nakaamgo kun nganong nahimong seloso si Tatay nga maoy sagad nga hinungdan nga magkalalis sila si Nanay Ludy.
Nakamatikod na diay si Tatay Metodio sa lahi nga lihok sa akong nanay ug ang tatay ni Edward maoy gipangabubhoan niini. Miabot gyud ang panahon nga wala na nila matago ang ilang pagbulingbuling sa ngalan ni tatay kay nasakpan man gyud sila sa akto sa akong amahan.
Daw sa mabuang ko sa maong hitabo. Mibati ko’g tumang kaulaw sa dakong eskandalo nga nahitabo sa among pamilya.
Ingon sa nawad-an ko’g gana sa akong pagtuon. Mura’g nawad-an og hustong direksiyon ang akong kinabuhi. Nakahukom kong muadto sa Cebu. Wala nako pahibaw-a si Edward sa akong desisyon.
Mibiya dayon ko sa among dapit. Misakay ko’g Ocean Jet paingon sa Cebu. May igsuon man si tatay Metodio nga nagpuyo sa Banawa si auntie Freda. Nakahunahuna ko nga adto mudangop. Nakatultol man ko sa ilang gipuy-an kay sa nagtungha pa ko sa elem. makadaghan ko naadto sa ila kuyog ni tatay Metodio.
Sa nahitabo sa among pamilya, nawad-an na ko’g paglaum nga makabaton og katumanan ang gugma namo ni Edward sa umaabot nga mga adlaw. -- Sumpayan pa