Sa usa ka beach sa Danao gipahigayon ang birthday party sa amiga ni Glenna. Presko kaayo ang hangin nga gikan sa dagat ug may pagka romantiko ang mao nga dapit tungod sa mga suga nga daw igo lang naghatag og dan-ag sa mga bisita.
Human ma-greet ang higala ni Glenna nga nag-birthday, mipahimutang sila si Lester sa lamesa nga nahimutang sa daplin ug bantang kaayo sa pag-aninaw nila ang mga bawod nga susama sa mohawok sa lapyahan.
Nahilom sila si Glenna ug Lester sulod sa pipila ka gutlo. Ang ila ra’ng mga mata ang gipalihok pinaagi sa pag-aninaw sa palibot. Ingon sa gitagbaw nila ang ilang mga mata pagsud-ong sa matahom kaayo nga talan-awon.
“Wala ka ba mingawa sa imong bana ma’am Glenn?” matud ni Lester nga maoy mibuak sa kahilom tali kanila ug sa iyang general manager. “Wala g’yud ko mingawa niya. Ayaw na lagi pag-maam nako Lester, Glenna na lang,” matud sa manager.
Mipahiyom si Lester. “Ikaw, nabasa nako sa imong biodata nga ulitawo ka pa, ngano’ng wala ka pa man magminyo Lester?” pangutana ni Glenna. “Gusto ko nga makakita og buotan nga babaye nga maoy akong mapangasawa, kanang pareho nimo kabuotan Glenn,” ni Lester.
Nakapahiyom si Glenna nga nakadungog. “Uy, kasuwerte unta nako no kun nagkakita pa kita diha’ng wala pa ko maminyo?” Milingiw si Lester ug ingon sa adunay gihuna-huna. Wala siya masayod unsaon pagtubay sa gisulti ni Glenna kaniya.
Gisabot pag-ayo ni Lester ang kahulogan sa gisulti ni Glenna. “Sa ato pa kun dalaga ka pa nga nagkita ta Glenn unya nanguyab ko nimo may kahigayonan nga imo ko nga sugton?” matud ni Lester nga nagpahiyom.
Mipahiyom usab si Glenna. Nagtinutokay sila si Glenna ug Lester. Walay mga pulong nga migawas sa ilang mga baba ug takulahaw lang nga gihuyop sila sa bugnaw kaayo’ng huyohoy gikan sa dagat. (Sumpayan)