“Wa man kay konsiderasyon panyero! Ingrato man ka!” malagutong pulong ni Atty. Ivan Nogras ngadto ni Atty. Nilo Garbo. Nag-abot sila ning sayong kahaponon sa pultahan sa Palace of Justice ning dakbayan. Nag-atbang sila’g kaso. Observers lang una sila. Kay duna pay mediation nga pagahimoon sa ilang kaso. Sa mediation, ang mga nagkihaay lang ang mag-abot. Apan magpaminaw lang sa duol ang mga abogado.
Nakapanglad-ok og laway si Nilo. “Gilabanan lang nako ang interes sa akong kliyente. Wa koy labot sa imong interes” pintok nga tubag ni Nilo. “Mao ba? Pero makapanglaban kaha ka sa imong kliyente? Kun gipasuspenso pa tika kay way bisan usang compliance sa MCLE Seminar? Samtang nia na ta sa ikalimang compliance?” ni Ivan. Nilantaw sa layo si Nilo. Sa niaging Biyernes, unang schedule sa mediation sa ilang kaso. Alas dos sa hapon ang takda. Tungod sa kusog nga ulan ug trapik, niabot si Ivan ug iyang kliyente nga kihante ug alas dos kuwarenta. Nagsugat na lang sila ni Nilo sa gawas sa Mediation Center. “Asa man mo, Nyor? Balik sa mo aron mag-mediation ta” ni Ivan. “Ah kamo na lay adto. Tan-awa lang kun unsay gisulat sa mediator” ni Nilo nga garboso kaayo’g tuno. “Mediation may atong tuyo. Nag-abot na man gyud ta” ni Ivan. Wa nagtingog si Nilo ug nipadayon og lakaw ngadto’s iyang kotse. Giadto ni Ivan ang mediator. May napatik na sa Mediation Report nga ‘Recommended for dismissal of the complaint”. Hapit moluhod si Ivan ug iyang kliyente sa mediator. Kay una pang schedule sa mediation. Dihang na-late lang sila, recommended for dismissal dayon ang kaso. “Nagsugat man mi ni Atty. Garbo. Unya, di na man sila mamalik dinhi” ni Nilo.
Nalooy ang mediator nila, gikansel ang recommended for dismissal. Gi-reset ang mediation. Gipapadala na lang sa LBC ang notice para ni Atty. Garbo ug sa iyang kliyente. Ang kliyente ni Ivan ang nigasto sa bayranan sa LBC.
“Nalooy ko nimo Nyor nga mawad-an og panguwarta kay di ka na kapanglaban.
Maong giatras nako ang pagkwestiyon nga wa kay MCLE compliance bisa’g usa. Unya, wa diay kay bisan diyutay’ng konsiderasyon sa imong brother lawyer? Na-late ko’g kadiyot tungod sa di maayong panahon, imo dayong ipa-dismiss ang kaso?
Ka wa gud nimoy utang kabubut-on!” ni Ivan. Nisirit og lakaw si Nilo nga way tingogtingog ug way lingilingi. Padulong siya’s mediation office aron pagtambong sa gitakdang ikaduhang mediation. Nisunod na lang si Ivan niya. “May abogado gyud diay’ng selfish kun makabintaha!” tuaw ni Ivan sa hilom.