Sayo kaayo nga mibangon si Lester niini’ng buntaga kay dili siya gusto nga mauwahi sa oras nga gigahin kaniya alang sa final interview sa giaplayan niya nga trabaho.
Nagtrabaho na si Lester isip bagger sa usa sa mga department store sa downtown area sa dakbayan sa Sugbo apan dili siya kontento sa suweldo.
Samtang nagpadayon sa pagtrabaho isip bagger, miduso si Lester og application ngadto sa usa ka kompaniya nga ang opisina nagbase diha sa Cebu Business Park.
Wala pa’y alas utso sa buntag, didto na si Lester kay alas 8:30 ang gitakda nga interview kaniya sa manager.
Taud-taud, may duha usab ka lalaki nga miabot, pulos usab mga hitsuraan ug husto sa pamarog. Dili usab hinuon mabentahaan si Lester sa pamarog kun itandi sa duha kay iya man nga gisul-ob ang “kinakusgan” niya nga sinena niini’ng buntaga.
“Huwat lang mo’ng tulo kay tagsa-tagsaon mo’g interview ni ma’am. Coming na ang manager,” matud sa secretary. Milingkod pagtarong si Lester, gihimo niya nga pormal ang liningkoran.
Wala kaayo moapil si Lester sa panagsultihanay sa duha ka laing applicants nga iyang nahibaw-an nga nagtrabaho usab sa laing kompaniya apan gusto lang mopahawa aron maka-experience og laing trabaho.
Wala madugay, may maanyag nga babaye nga misulod sa opisina ug gisugat siya’g greetings sa secretary. Good morning ma’am, dia na sila.” Abtik nga mibarog si Lester ug nangayo’g katahoran.
“Good morning ma’am,” matud ni Lester nga mitimbaya sa manager. Igo lang misundog kaniya ang duha ka laing aplikante sa trabaho. Taud-taud, gipasulod sa manager ang duha ka aplikante, gidungan sila’ng duha.
“Maayo ang imong gibuhat kay gusto kaayo si ma’am sa mga buotan nga kawani, sama sa gipakita nimo kaniya bag-o pa lang,” giingnan si Lester sa secretary.
Wala madugay, nanggawas ang duha ka aplikante ug gipasulod dayon sa secretary si Lester ngadto sa opisina sa manager. (Sumpayan)