Gula 6
“Mahimo ba nga makigdungan ko nimo’g lunch? Ako diay si Raymond Razon, anaa ‘sab ko nagtrabaho sa taas niini’ng Gorones building,” matud ni Atty. Razon nga wala magpaila nga usa siya ka abogado.
Mipahiyom si Carolyn. “Sige, malipay ko nga makigdungan nimo’g paniudto apan ako na ‘say mobayad sa atong order. Ikaw diay ang magsige nako og libre nga inigbayad nako, gibayran na,” nagpahiyom si Carolyn nga mitutok ni Atty. Razon.
Sa hilom nakadayeg kaayo si Carolyn sa dili pagka hambugero ni Atty. Razon kay wala gani kini magpaila nga usa siya ka abogado. “Dili ba abogado ka man? Ngano nga wala ka man magpaila nga atorni?” matud ni Carolyn.
Igo lang mipahiyom si Atty. Raymond Razon. “Alang kanako, dili angay nga ipasigarbo ang imong profesyon sa tanang higayon, ilabi na kun makighigala ka og babaye nga hapit na usab mahimo’ng abogado,” ni Raymond pa.
Nakamatikod si Carolyn nga nasayod si Atty. Razon nga gradwado usab siya sa Bachelor of Laws. Wala na siya makatago sa iyang pag-apil gani sa Bar pagka Oktubre. “Mao bitaw nga mitrabaho ko atorni bisan og angay g’yud unta nga mag-review kay aron aduna ko’y magasto sa pag-review ug pag-bar sa Manila.
Wala kaayo sila magdugay sa pagsultihanay kay matud ni Atty. Razon nga may bista siya sa korte pagka alas dos sa hapon. Apan sa wala pa kini mobiya, nagbayloay sila og mga contact numbers.
“Sige Lyn, bahin sa imong panggasto sa pag-take nimo’g bar, ayaw’g hatagi og kahulogan kun motabang ko nimo,” ni Atty. Razon nga mipig-it sa kamot ni Carolyn sa dayon niya’ng saka sa iyang bopete sa third floor samtang si Carolyn sa second floor. Malipayon kaayo si Carolyn. (Sumpayan)