Dear Tita Salie,
Maayong adlaw. Tagoa lang ko sa ngalan nga Ms. Capricorn, 20 yrs of age, dalaga pa.
Ang akong problema mahitungod kini sa akong lovelife. Unsaon man gud, Tita Salie, nga duha man gud kabuok ang akong uyab ug pareho silang akong gimahal pag-ayo, bisan layo sila nako.
Ang usa nako ka uyab naa sa barko kay nag-apprentice man siya ug ang usa tua ra sa among probinsiya ug ako ania sa Cebu.
Nagproblema ko kay kun mopauli ko sa amoa pareho silang duha nga makigkita nako. Mao nga magkapuliki ko’g tago. Karon nahasol na usab ako kay mouliay na man pud ko.
Dili nako mabulagan ang usa tungod kay wala man ko masayod kun kinsay akong pilion. Palihog pasabta ko sa angay kong buhaton. Salamat.
* * *
Good day,
Ingon gyud niini ang mahitabo kanato kun sa atong pangbuhaton dili kita magayran sa hustong kamatuoran.
Dapat unta imong gihunahuna kun unsaon man nimo ang duha ka buok uyab. Kay kun moingon ka nga reserba, sama sa reserba nga ligid itago ra gyud kini ug unya ra gamiton kun ugaling naguba ang nagdagan nga ligid sa samang paagi imong tan-awon kun kinsay imong himoon nga reserba.
Apan ang tawo dili man gud siya usa ka butang, busa dili gyud maayo nga himuon nato siyang reserba. Sa dili ka pa mopauli kinahanglan imo na nga nahan-ay ang tanan. Buot ipasabot nga kinahanglan nga usa ra gyud ang imong pakigkitaan. Sayop lang nimo kay hasta ang imong reserba imo man usab nga gipahibalo. Sama ra nga naghimo ka og problema aron dunay makahasol kanimo.