Gula 2
“Ayaw lang kaikog, ambi ang imong bag,” giingnan si Elmer sa babaye nga nagpahiyom kaniya. Tuod, gitunol ni Elmer ang iyang bag ngadto sa babaye nga naglingkod na sa iyang gilingkoran kaganina. Sa daplin sa bentana naglingkod ang babaye ug si Elmer nagtindog tungod sa iyang gilingkoran. Pag-abot nila sa Mambaling, nabantayan ni Elmer nga ang pasahero nga gikatupad sa babaye, mora’g wala mahimutang.
Nagsigi kini og panghikap sa iyang duha ka bulsa. Dayon gitan-aw pag-ayo ang sulod sa iyang bag. “Para! Para! Ihunong bai!” singgit sa pasahero ngadto sa konduktor. Misirbato ang konduktor ug mihunong ang bus.
“Manaog ko bai, nahabilin ang akong selpon! Tua gi-charge nako sa canteen sa terminal nga akong gikan-an,” matud sa tawo dayong tindog ug nanaog. Gisuwerte si Elmer nga ingon sa gihatagan siya’g higayon nga makatupad og lingkod sa babaye.
“Salamat, dili na g’yud tawon ko kapuyon sa pagtindog,” matud ni Elmer ngadto sa babaye nga iyang gitabangan nga makasakay. “Salamat kaayo nimo ha? Kun wala ka pa, dili gayud ko makapauli karon,” matud sa babaye.
Nagpaila si Elmer sa iyang kaugalingon ngadto sa babaye. Gitunol sa babaye ang iyang tuo nga kamot ngadto ni Elmer. “Grace ang akong ngalan Elmer.” Lugar kaayo sila nga nagsultihanay samtang nagdagan ang gisakyan nila nga bus paingon sa Balamban.
“Gentleman ka g’yud kaayo Mer,” matud ni Grace. “Ngano nga nakaingon ka man ana?” ni Elmer nga napalingi kang Grace. Gipasabot siya sa dalaga nga tagsa na lang ang lalaki nga mohimo pagtanyag sa iyang lingkoranan bugti sa kasayon ngadto sa mga babaye.
Mitug-an si Grace kang Elmer nga kinahanglan gayud nga mouli siya sa Balamban kay bisperas sa pangilin sa ilang barangay sa Hingatmonan. “Suroy hinuon ta sa among lugar Mer, mamista ‘sab ta inigka-ugma,” ni Grace. (Sumpayan)