Padayon ang ulan ning buntaga. Mokilat unya sundan dayon sa masipang lite. Naghukdong si Boy nga nagpuk-ong sa lantay’ng kawayan nga simpig sa bentana sa ilang balay. Nasiklapan niya ang iyang Papa Binog ug mama Lita nga nagdungan og higop sa kape nga gama sa gipaig nga lugas sa mais, aron masudlan og kainit ang ilang kuwabkuwab.
Sa sug-angan sa ilang abohan, gisug-ang na sa iyang Mama Lita ang lamaylamay nga utan sa agbate, talong, batong, sikwa, kamatis, kalbasa, gabi ug kamunggay nga subakan sa tinap-anang katambak. Paresan kini nila sa binuyok nga kan-ong mais nga naluto na sab.
Tungod kay Sabado, way klase ang publikong hayskol nga eskuylahan sa Caduawan nga sakop sa lungsod sa Tabogon, nga gi-eskuylahan ni Boy. Sa edad nga 17, fourth year high school na si Boy nga bugtong anak sa iyang Papa Binog ug Mama Lita.
Mikilat na usab. Unya, kalit nga gisundan sa masipa ug makabungog nga lite. Milipak! Maoy nabantang sa panan-aw ni Boy lahos sa bentana, ang nag-inusarang dakong punoan sa saging kardaba nga nagsapnay og puso, nga morag gibaliksan ang lawas sa nagkidlapkidlap nga boltahe sa kuryente, gikan sa kinaubsang punoan ug lahos ngadto sa kinaibabwang punoan sa saging. Klarong gikilatan ang bugtong punoan sa saging sa atbang! Ug may sinaw’ng butang nga nalantawan si Boy nga mitaroy sa lawas sa punoan sa saging.
“Hala! Ngipon sa kilat!” nakatuaw si Boy. Ug nahinumdom ang batan-ong kaisipan ni Boy sa gisulti sa iyang anhing Ingko Pisyo.
“Ang ngipon sa kilat maoy usa ka birtud kon mahuptan kini sa tawo. Ang maghupot niini, mahimong isog, kursonada, intelehinte, kusgan ug abtik kaayo’g lihok!”
Sa pagtuang sa ulan, nagdaling mikanaog si Boy sa balay ug giduol dayon ang nag-inusarang dakong punoan sa saging kardaba nga gikilatan. Nalawos ang tanang mga dahon nga mora’g gihawob sa kalayo. Ug ang tibuok lawas sa punoan sa saging, daw milagom nga nasunog, diin nagtaroy ang lab-as nga ngipon sa kilat nga may dugo pa. Gibira ni Boy ang ngipon sa kilat nga sinaw kaayo.
Nakapahiyom siya. Kun tinuod man ang gisulti ni anhing Ingko Pisyo, mahimong dili na siya talawan, kursonada na siyang mosikitsikit sa naibgan niyang klasmeyt nga dalaga nga si Josephine. Ug tingali, tungod sa ngipon sa kilat, mahimo na usab siyang kusgan ug mosamot sa pagka-intelehinte sa klase sa eskuylahan.
Ug gitutokan na usab ni Boy ang ngipon sa kilat. Iya kining hilom nga tipigan kay gitugahan siya niini ug panid-an ang epekto sa umaabot nga mga adlaw. (Kataposan)