Gula 12
“Kutob sa mahimo dili lang una nato ibutyag ngadto sa akong mga ginikanan ang atong relasyon. Mahimo ba, Edward?” Gihangyo ko siya.
“Ikaw ang mag-igo.” Dayon mihalok si Edward sa akong lips. Pagkahuman mainampingon siyang mikanaog sa balay agi sa bentana.
Pagkabuntag, sayo kong mibangon aron maligo. Human makaligo, presko kaayo ko nga migawas sa banyo nga nagtapis lang og tualya ug midiretso sa akong lawak aron mag-ilis. Pagkahuman miadto ko sa komedor kay nangagda na si nanay Ludy alang sa pamahaw. Sa sinugdan, wala kami tingogay nga nangaon.
“Dinhi ka lang sa balay, Jezebel, ha,” giingnan ko ni Nanay dihang naghinungatunga na ang among pagpangaon. “May lakton kami si Tatay nimo.
“Asa man diay kamo, Nay?” Nangutana ko.
“Moadto mi sa Ubay,” si Tatay Metodio maoy mitubag. “Mohatod mi sa paglubong sa anak sa kauban nako sa trabaho nga namatay niadtong Lunes.
Gitibawas namo ang pangaon. Human makapamahaw, nangandam dayon sila si tatay Metodio ug nanay Ludy sa ilang lakaw.
“Ayaw biyai kining balay samtang wala mi, ha,” tugon ni nanay kanako. -- Sumpayan pa