Gula 1
Giabot og kagutom si Narding mao nga giparking niya ang iyang motorsiklo atubangan sa usa ka bakeshop daplin sa Natalio Bacalso Avenue. Mipalit siya og iyang matimo-timo ingon man usa ka baso nga pineapple juice.
Samtang nag-usap sa iyang gikaon, gikuha ni Narding ang iyang pitaka ug gihabwa ang iyang kuwarta. Iya kini’ng giihap kay gusto ni Narding nga masuta kun pila na lang ang nahabilin sa iyang suweldo.
Tag kapin sa P20 mil ang makobra ni Narding sa mata’g kinsena kay supervisor man siya sa ilang kompaniya. Wala usab mag-abang si Narding ug ang iyang asawa kay anaa ra man sila mopuyo sa daan nila’ng balay. Nagpatukod og bag-ong balay ang iyang amahan.
Kapin pa sa P10 mil ang diha sa pitaka ni Narding ug may tinigom pa siya sa bangko. Napalingi si Narding sa batan-ong babaye nga didto naglingkod sa pikas lamesa. Mi-smile kini kaniya.
Gibalik ni Narding ang kuwarta pagsulod sa pitaka ug giluklok sa luyo nga bulsa sa iyang karsones. Mitungab siya og juice, dayon gipang-it ang spanish bread nga iyang gi-order.
Mitindog ang pution nga babaye gikan sa iyang gilingkoran ug mitan-aw sa mga baligya. Dayon milingi kini sa atbang sa karsada dungan sa pagtan-aw sa iyang selpon nga diha sa tuo niya’ng kamot.
Gipasiklapan ni Narding ang babaye. Sa iyang bana-bana mag-18 anyos pa kini ug hamis kaayo og pamanit. Nagsul-ob lang kini og short pants nga mubo kaayo. Miduko si Narding apan gipaliraw niya ang iyang mga mata pagpasiklap sa hamis kaayo’ng paa sa babaye.
Lain kaayo ang iyang gibati nga nagsud-ong sa makapadani nga talan-awon. (Sumpayan)