Bisan og nakagawas na si Marco sa ospital, wala’y putol ang pagbayloay nila og text messages ni Dra. Marlyn. Nahimo na hinuon sila nga suod nga managhigala. Ang batan-ong doktora pa gani maoy nakakumbinsir ni Marco nga dili na kayo magsige’g sakay og motor tungod sa kapilegro.
Sa hilom wala magmahay si Marco nga nahitabo ang aksidente nga nabag-iran siya sa sakyanan nga gimaneho sa batan-ong doktora tungod kay mao kini ang hinungdan nga nagkaila ug nagkasuod sila si Dra. Marlyn.
Dili lagyo og gintang ang ilang pangedaron. Sanglit si Marco nakaundang man og usa ka tuig sa iyang pagtungha diha nga didto siya mopuyo sa iyang uyoan sa Estados Unidos sulod sa usa ka tuig.
Nahimong inspirasyon ni Marco ang batan-on nga doktora sa iyang pagtungha tungod sa gitagoan niya nga pagmahal niini. Nangandoy sa hilom si Marco nga mahimo niya’ng girlfriend si Dra. Myrna. Hinuon, usahay moabot sa iyang huna-huna nga tingali og dili na siya molampos pag-angkon sa iyang gugma.
Diha sa huna-huna ni Marco nga tingali si Dra. Myrna may boyfriend na ug hayan nga sama kaniya nga doktor. Si Marco nagtungha pa sa pagka-engineer. Anaa na hinuon siya sa ika-lima ka tuig sa iyang kurso.
Miabot gayud ang higayon nga nakakita’g lugar si Marco nga makapalabtik siya’g estorya sa batan-ong doktora aron pagsuta sa iyang lovelife. “Wala ba maselos ang imong boyfriend Mar nga magkita-kita ta?” ni Marco pa nga mahinamon nga nagpaabot sa tubag gikan sa doktor.
“Wala ko’y boyfriend uy! Two years na nga nagkabuwag mi sa akong X-BF,” matud ni Dra. Marlyn. “Mas labing maayo kay nabalaka ko nga tingali’g magselos ang imong boyfriend kay kanunay ra ba ta nga magkita,” ni Marco pa nga nagpahiyom.
Sanglit Sabado, giawhag ni Dra. Marlyn si Marco nga manuroy sila sa dakong mall sa north reclamation.
Nangaon sila sa usa ka restaurant ug nakapasamot kini sa ilang kasuod. Miabot ang higayon nga birthday ni Marco. Giimbitar niya si Dra. Marlyn sa ilang balay. (Sumpayan)