Usa ka gamay’ng bato ang gilabay ngadto sa tubig. Ug naggikan ang maong bato sa luyo ni Rey.
Mihinay pagliso si Rey aron pagsuta kun may tawo ba sa iyang luyo. Ug mao na lamang ang iyang kahikugang pagkakita sa babaye nga nagtindog dili layo sa nag-igdal nga bato nga iyang gilingkoran. Si sister Veronica! Nabatyagan ni Rey nga mikalit pagkuba ang iyang dughan, daw gilusak sa kapid-an ka nga mga alho.
Mibalik si Rey sa iyang kahimtang kaganina -- nga nag-atubang sa lawod. Gitalikdan niya si sister Veronica. Wala kini niya tagda. Naglibog karon ang iyang hunahuna kun giunsa pagkasayod sa madre nga ania siya sa Isla Paraiso. Ug nganong miagpas man kini niya dinhi sa maong isla? Alang sa unsa pa? Aron dugangan ang iyang mga kasakit?
Ingon sa dihay mihuot sa tutonlan ni Rey. Mihinay siya pagtindog ug milakang pahilayo kang sister Veronica. Wala gayud siya motan-aw niini. Gusto siyang molikay sa babayeng iyang gihigugma nga usa ka madre.
“Rey...”
Napahunong si Rey paglakaw pagkadungog sa hinay’ng pagsangpit sa madre kaniya. Wala gihapon siya molingi niini. Misamot ang kakulba ang iyang gibati. - Sumpayan pa