Gula 242
Si sister Veronica ingon sa gilaayan sa biyahe bisan og kusog ug tulin kaayo ang paglawig sa pump boat nga ilang gisakyan tadlas sa kadagatan tabok ngadto sa Isla Paraiso. Naghinamhinam na siya nga makaabot sa isla. Gusto na niyang makita si Rey. Kagabii pa nga wala mahimutang si sister Veronica. Wala siya’y maayong kinatulgan. Sa iyang pagkasayod nga si Rey atua diay sa isla Paraiso, nag-alindasay na siya. Sama siya sa nakasaghid og usa ka katol nga kasayoran. Giagda gani niya ang Corporal nga motabok gilayon sila ngadto sa isla. Apan mibalibad si Benturada sa katarongan nga kuyaw ang pagbiyahe sa kadagatan panahon sa kagabhion ilabi na kun pump boat lang ang sakyan. Mao nga gihulat na lang nila nga moabot ang kabuntagon.
Nahinumdom siya nga ang Isla Paraiso usa sa mga kinaham nga dapit ni Rey. Gani nakakuyog man siya’g kausa niini nga nanuroy sa maong isla. Mao kadto ang higayon nga gisultihan siya sa lalaki nga ang Isla Paraiso maoy dapit nga dangpan niini sa higayon nga buot kining makabaton og kalinaw sa hunahuna. Mao nga sa dihang misugilon si Corporal Benturada nga si Rey atua sa dapit nga buot niining mabatonan ang kalinaw sa hunahuna, wala na magduhaduha si sister Veronica nga si Rey atua sa Isla Paraiso. Apan ngano gayod nga wala siya makahunahuna gilayon sa maong isla. (Sumpayan pa)