Unya nakita ni sister Veronica nga sa dihang gipiyong ni Rey ang iyang mga mata, may mga luha nga miuliot paggawas sa gitikyop niining mga tabontabon.
Inanay niyang natugkad karon nga si Rey nagbaton og kahiubos kaniya. Karon pa niya matugkad kun unsa kasakit alang kang Rey ang iyang gibuhat ngadto niini. Kalit kaayo ang gipakanaog niyang desisyon sa pagputol sa ilang relasyon. Giputol niya ang ilang relasyon gumikan sa katarongan nga alang kaniya maoy husto ug wala na gani niya pamatia ang mga pangatarongan sa lalaki.
Nasayod siya nga gihigugma siya ni Rey. Wala siya’y pagduha-duha sa pagmahal niini kaniya. Gani, sobra na kaayo ang pagpasakit niini kaniya. Karon pa siya makaamgo nga dili diay unta angay niyang buhaton kang Rey ang sama sa iyang nabuhat ang hinanali nga pagputol sa ilang relasyon.
Sukad nga gidaygan niya si Rey nga giputol na niya ang ilang relasyon, wala na gayod kini mopakita sa kombento. Nasayod siya nga nakasabot si Rey sa buot niyang mahitabo ug mipasagnunot lang kini sa iyang gusto bisan og usa kini ka dakong sakripisyo sa iyang bahin.
Apan sa laing higayon, nagpasakit si Rey alang kaniya. Sa dihang gidagit siya sa mga tulisan, gisugal ni Rey ang kinabuhi niini aron pagluwas kaniya.Kini ang labing dakong sakripisyo nga gihimo ni Rey tungod sa gugma niini kaniya. Andam si Rey sa pagpakamatay tungod kaniya. -- Sumpayan pa