Dugay nang nangulitawo si Masoy kang Adenara. Guwapa si Adenara nga bugtong anak sa magtiayong Pascual-Linda. Si Pascual usa ka polis sa lungsod ug si Linda manindahay og isda sa merkado. Sila mismo dili gyud gusto kang Masoy tungod lagi sa tabitabi nga si Masoy kaliwat og ungo.
Anak si Masoy ni Alfonso nga usa ka abogado apan wala na manglaban dihang kalit kining naparalayis ug dili na kalakaw. Ang asawa ni Alfonso (inahan ni Masoy) nga si Berta patay na kay matud pa napusilan. Ug karon dili gyud gusto sila si Pascual ug Linda sa pagsige’g pamisita ni Masoy kang Adenara.
“Hoy, Ade, kun moanhi kana si Masoy dinhi sa ato, tago ug ayaw atubanga kay basin og tayhopan ka ug unya mahimo ka sab unyang mangtas nga ungo,†ni Linda pa ngadto sa anak. “Kun nia na siya akoy moatubang kay kasab-an ko nang tawhana.â€
“Unsa, Ma, imong kasab-an si Masoy, kaluoy sab no,†ni Adenara nga mora’g gibati’g kabalaka sa pagabuhaton unya sa iyang inahan.
“Sus, baya nimo, luoyluoy ka kay nahigugma ka tingali anang Masoy,†ni Linda pa.
Wala motingog si Adenara. Unya may nangayo’g katahoran, si Masoy. “Maayo, maayong udto,†niini pa. Gipadayon si Masoy apan si Linda ang miatubang.
“Nia si Adenara, nang Linda,†ni Masoy pa. Guwapohon nga pagka-ulitawo kini si Masoy.
“Wala. Tua sa siyudad,†mubong tubag ni Linda. Unya, “Hoy Masoy, mahimo ba nga dili kana magsige’g anhi dinhi sa amo. Kay dili mi gusto nga ikaw maoy mahimong hinigugma sa among anak...â€
Wala motingog si Masoy. Gitutokan si Linda og dugay. Unya daw nahipnotayis ug ingon sa miuyon na si Linda kay miingon man kini, “Masoy, okey ra man mi si Pascual, nga ikaw maoy mahimong uyab sa among anak.†Ug mao kadto nga naminyo gyud si Adenara kang Masoy.
Ug kay dato sila si Masoy nga dunay dako ug lapad nga umahan nga gikoral diin didto himoa ang kasaulogan sa kasal sa duha, dunay daghang bisita si Masoy, mga kaliwat ra sab nila. Unya, kalit nga gikulbaan si Adenara sa iyang nakita kay mao may iyang nasaksihan ang tanang mga bisita nila pulos na man mga laksot og hitsura. Ug iyang nakita si mama niya Linda ug papa niya Pascual nga laksot na pud ang hitsura. Nanagsayaw na ang tanang mga bisita sa tugtog sa mahawot kaayong musika. Unya mihinay’g sulti si Masoy, niya pa, “Adenara, ikaw na lang ang wala pa nako patakdi, apan dali ra kini, kay asawa ko na man ikaw, ugma, mahimo ka nang sama sa among kaliwat, he, he, he, he†ug iyang gihagkan sa mga ngabil si Adenara. (Kataposan)