Sa edad nga kapin sa kuwarenta, nasuta ni Rey nga lig-on ug kusgan pa si Col. Villadar. Maantigo usab kining makig-away sa mano-mano.
Nagsinukliay og kinumo sila si Rey ug Col. Villadar. Niining tungora, si sister Veronica nahapalingkod sa usa ka suok nagkurog kini nga nagtan-aw sa duha nga nagsambunot. Gigamhan ang madre sa tumang kahadlok.
Usa ka makusog nga kinumo ni Rey ang nakaigo sa apapangig ni Col. Villadar. Mitulilik ang koronel ug nahapaod ang nawong sa bungbong.
Midali si Rey pagduol sa koronel. Apan maoy misugat kang Rey ang kusog kaayong patid sa koronel nga miigo sa iyang dughan. Nahasukamod si Rey sa salog.
Si Koronel Villadar abtik nga milukso aron unta ub-an si Rey. Apan kalit kaayong miligid si Rey ug ang koronel mihagsa sa salog nga semento nga hilabihan kabantok. Sa kahimtang nga naghayang, pabor kaayo sa siko ni Rey ang nagkulob nga koronel. Iyang gisiko ang nawong niini. Nahaligid ang koronel sa salog. Gipasundan pa gayud kini ni Rey sa usa ka makusog nga patid.
Mibangon si Rey aron unta moduol sa koronel nga nagkulob gihapon sa salog. Apan sa naduol na siya niini, kalit kining mibalit-ad ug naabtan gayod ang iyang suwang sa makusog nga patid niini. -- Sumpayan pa