Hapit magdungan ang mga kaaway paghagsa sa salog nga semento human maigo pagpusil ni Rey. Mipadayon na usab si Rey ngadto sa unahan. Sa gihapon, dagan-tago ang iyang gihimo. Paspas ang iyang mga lihok, daw nakiglumba sa matag pitik sa mga kaaway.
Nagpadayon si Rey pagpakigpinusilay sa iyang mga kaaway. Karon pa siya masayod nga hilabihan diay ka daghan ang mga tulisan nga gihimong sakop ni Col. Villadar. Dili niya mabanabana ang ilang gidaghanon. Daghan na ang iyang napatay apan ingon sa daghan pa gihapon ang nahibilin nga buhi.
Ang lanog ug alingawngaw sa nagkadaiyang buto sa armas nagpadayon pagsangag sa sulod sa abandoned warehouse. Si Rey kilas kaayo’g mga lihok. Sama siya sa labing igmat nga mananap sa lasang nga nakigsangka sa mga kaaway. Matag karon ug unya, may mga gutlo sa kamatayon nga mosapaw sa butobuto sa higayon nga may maigo si Rey sa iyang pagpusil. Nagpasad na ang mga patay sulod sa bodega.
Wala madugay, nahitukmaan ni Rey ang usa ka hagdanang semento paingon sa ubos. Misantop gilayon sa hunahuna ni Rey nga malagmit ang maong hagdanan paingon sa underground sa maong bodega.
Kadali ra siyang nakaumol og hukom. Mokanaog siya ngadto sa ubos -- sa underground. Nagduda siya nga atua didto si sister Veronica ibutang sa mga kaaway. -- Sumpayan pa