Nakahukom si Rey nga pahinuntan niya ang kaaway kay aduna siya’y buhaton niini. Dihadiha gipaubos niya ang iyang kamot nga may armas. Apan gituyo niya nga didto kini mohagsa sa tiil sa kaaway.
Tuod man, paghagsa sa Uzi sa tiilan sa kaaway, nakamugna kini’g kahikugang sa maong lalaki nga nagtion kang Rey ug hinagiban. Dihadiha gikalitan ni Rey paglubag ang kamot sa kaaway nga wala makabantay sa kilatnon niyang lihok. Nabuhian ang pistola nga gigunitan niini. Dihadiha gipaod kini ni Rey sa haligi samtang ang iyang walang kamot nagmaneho pagbunot sa .45 kalibre nga gisuksok sa iyang hawakan. Unya iyang giduot ang tumoy sa maong armas sa lawas sa kaaway ug gikablit kini. Ang kaaway nga gilapsan ang lawas sa mga bala miting-ab dayong kalusno sa salog nga wala nay kinabuhi.
Gidali pagpunit ni Rey ang iyang Uzi ug ang pistola sa kaaway nga nahulog sa salog. Iyang gisuksok ang maong pistola sa iyang hawakan. Ang iyang .45 kalibre diha gihapon sa iyang walang kamot samtang ang Uzi gikuptan sa iyang tuong kamot.
Mipadayon na usab si Rey sa pagpangita ni sister Veronica. Nagtuo siya nga usa ka sekretong dapit sa sulod sa bodega ang gibutangan kang sister Veronica. Suhiron niya ang tanang dapit sulod sa bodega aron pagpangita sa madre.
Rat-tat-tat-tat-tat-tat-tat-tat! Bang! Bang! Gikablit ni Rey ang.45 kalibre ug Uzi sa dihang may nasugatan siyang mga kaaway. -- Sumpayan pa