Batasan ni Rudy nga kada abot niya og mall, moadto gyud siya sa pansayan aron mangihi. Ug kada biya sab niya, mohapit og CR kay mangihi. Mora man gud siya og bus-awon. Tungod sa iyang dayabitis ug sa iyang water therapy. Kada 30 minutos kaihion siya. Tunga’s galon nga tubig iyang imnon kada huma’g kaon.
Karon, alas tres imedya sa hapon, nihapit siya sa Metro Ayala. Sayo siyang nibiya sa opisina niya sa Accounting Firm sa Calamba ning dakbayan kay nanugon iyang kapikas nga si Almira nga pahapiton siya sa grocery section. Nangompra iyang kapikas alang sa ilang sinemana nga konsumo. Igo lang siyang nakasulod sa pultahan sa mall, human nahikap sa mga guwardiya iyang kilid, nibagting iyang selpon sulod sa iyang bulsa.
“Hello†niya pa human niya kuhaa ang selpon gikan sa bulsa sa iyang pula nga T-shirt dapit sa dughan.
“Hain na man ka?†tingog ni Almira.
“Mao pa gyu’y akong pagsulod sa mall†ni Rudy.
“Human na ko’g pangompra. Naghulat na lang ko nimo aron tabangan nimo’g dala sa mga plastic bag sinudlan sa kinompra,†ni Almira.
“Manaug na ko diha. Pero mohapit una ko sa CR†ni Rudy.
“Sige†ni Almira. Gibalik ni Rudy og sulod sa iyang bulsa sa dughan ang selpon.
Pagsulod niya sa CR sa mga lalaki, may tulo ka ihianan. May tawong nangihi sa tunga. Gipili ni Rudy ang dapit sa wala sa tawo. Kapin kun kulang, balig tres minutos ang gidugayon sa iyang pagpangihi. Tungod sa kadaghang tubig sulod sa iyang pantog. Dugaydugay gyud siyang nahuman og pangihi. Unya ang tawo sa iyang too, wa gihapon kahuman og pangihi. Sa paniid lang ni Rudy kay wa man gyud mobiya atubangan sa ihianan.
Abi ni Rudy og mas daghan og ihi ang maong tawo. O mas grabe pa kay kaniya muinom og tubig sa water therapy. Pagbiya ni Rudy sa ihianan, nag-atubang lang gihapon ang tawo sa ihianan. Wa kaagwanta si Rudy. Nipasiklap kun unsay gibuhat sa tawo.
Nagsige na lang diay og pindot sa selpon ang tawo nga sayisintahon na og hitsura. Nagteks na lang diay siya atubangan sa ihianan. Human na diay siya’g pangihi. Unya naatlan nga dunay text message atubangan sa ihianan. (Katapusan)