Gula 203
Kutob sa mga kaaway nga makit-an ni Rey wala niya hatagi’g higayon nga makahimo’g kadaot kaniya. Giunhan niya sila pagpusil.
Mata’g karon ug unya motago si Rey kun wala nay bala ang iyang armas. Apan kadali ra niya kining mailisan og magasin ug mogawas gilayon siya sa iyang gipasalipdan aron pagpakigsangka sa daghan niyang mga kaaway.
Usa ka kaaway ang nakit-an ni Rey nga nagbitbit og grenade launcher. Gitumong kini sa kaaway kaniya. Dihadiha midagan si Rey, misaka sa ibabaw sa gipatongpatong nga mga sinako nga wala siya masayod kun unsay sulod ug unya miambak ngadto sa luyo. Igo lang gayod nga mihagsa ang iyang lawas sa salog nga semento, miulbo ang sinako nga naigo sa rifle grenade.
Midali si Rey sa pagpahilayo sa maong dapit. Wala siya sa hustong posisyon aron makigharong sa kaaway nga migamit sa armas nga makalilisang. Nangita siya’g maayong puwesto.
Kun makahigayon na ug makapabor na siya luthangon niya ang maong kaaway aron iyang makuha ang armas nga gigunitan niini. Makatabang pag-ayo kaniya ang maong armas sa pagpakigsangka sa iyang mga kaaway nga wala niya maseguro kun unsa kadaghan.
Mikamang si Rey. Misuong siya sa ilawom niadtong usa ka awtong gubaon. -- Sumpayan pa