Ang ungo sa kinatumyang bungtod

Gidudahan sa mga lumolupyo dinhi sa balangay sa Tiglugsong nga si Ingko Masiong mao ang mibalbal kang Anaclito nga mananagat, nga sa laktod nga pagkasulti hilabihan na kuno ka mangtas nga ungo kini si Ingko Masiong. Dunay wala motuo nga si Ingko Masiong mao ang ungo ug kini mao si Sabel, ang biyuda nga nagpuyo sa may tampi sa lugot sa sityo Magdugdog.

Kay matud pa ni Sabel usa ka Diosnon nga tawo si Ingko Masiong ug hilabihan ka hinimbahon ug makita gani siya nga molugsong gikan sa gipuy-an niyang payag sa taluktok sa bungtod sa sityo Agungal ug makita usab nga dunay dakong krusipiho nga nagbitay nga iyang gikuwintas.

“Dili ko motuo, uy, nga ungo si Ingko Masiong. Siya man gani ang mitambal nako dihang mihubag ang tuhod. Motuo nuon ko nga si Ingko Masiong usa ka batid nga mananambal,” ni Sabel pa nga mipahayag kang Dungkoy nga tig-alsa’g sinakong kopras sa bodega ni Insek Akoy sa lungsod. Dunay kaibog kini si Dungkoy kang Sabel ug gusto niya iya kining pangasaw-on kay lagi nindot pa gihapon ang lawas sa biyuda ug puti ang pamanit niini.

“Basta si Ingko Masiong gyud mao ang mibalbal kang Anaclito, Sabel. Ug maoy among tumong karong gabii nga adtuon si Ingko Masiong sa iyang payag sa taluktok sa bungtod ug unya bitayon siya namo,” mura’g may kasuko ang tingog ni Dungkoy. Lagot kaayo siya sa pagdapig ni Sabel kang Ingko Masiong. Tuod, pagka-gabii, didto na sila si Dungkoy sa tugkaran sa payag ni Ingko Masiong sa taluktok sa bungtod. Nakurat si Ingko Masiong sa pagtumaw sa upat ka mga tanod nga kuyog ni Dungkoy.

“Hala, gaposa dayon ninyo kanang ungo!” lanog ang tingog ni Dungkoy.” Hugta gyud paggapos ug guroya ninyo paingon sa ubos...”

“Ngano ni Dungkoy, nga inyo man kong gaposon?” nahibulong si Ingko Masiong. “Unsa bay akong sala, ha?”

“Ungo ka! Ikaw ang mibalbal kang Anaclito!” Kusog ang tingog ni Dungkoy.

“Maayo hinuong nia mo,” ni Ingko Masiong pa dayong hamag sa mga tanod nga kuyog ni Dungkoy ug iyang gipangbunso sa yuta. Dayon iyang gisunod si Dungkoy. Iya pa gyung gituok ug unya gipadulot ni Ingko Masiong ang iyang tag-as nga mga kuko sa liog ni Dungkoy. “Ahhh....kalab-as sa imong dugo, Dungkoy,” ug gisunod niya pagsuyop ang dugo sa upat ka tanod.

Unya miabot si Sabel ug nasaksihan niya ang pagsuyop sa tiguwang sa dugo ni Dungkoy ug sa upat ka tanod. Nakatuaw si Sabel, “Ingko Masiong, ungo ka diayyy!” ug midagan siya pahilayo gikan sa payag sa ungo nga si Ingko Masiong. (Kataposan)