Dear Tita Salie,
Maayong buntag. Ako diay si Kim, dili pa kasado apan duna koy live-in partner apan layo kanako tungod kay tua man siya sa Japan nagtrabaho. Apan bisan kun layo kami sa usa’g-usa wala kami problema tungod kay buotan man ang akong partner ug masinaboton pa.
My problem is about his family. Naglagot na ko Tita Salie, kay magtunga god mi sa iyang mama kun magpadala og kuwarta ang akong partner. Apan ang iyang mga igsuon daghan pa kaayo og estorya. Magsige og text kanako og mga sakit nga mensahe.
Halos di nako kaya, Tita, ug usahay makahunahuna ko og bulag sa akong partner aron dili nako magproblema pa. Apan ang akong partner moingon ra man nga pasagdi lang na sila, ang importante nga love nato ang usa’g-usa. Naglibog na hinuon ko, Tita Salie. Unsa may akong buhaton? Palihog pasabta ko. Thanks and God bless.
* * *
Everdearest Kim
Mao gyud kini ang kasagaran nga isyu sa mag-inlaws kun ang kapikas o ilang igsuon tua magtrabaho sa gawas.
Sa akong pagsabot niining maong sitwasyon, pangigi ang lintunganay niining maong problema. Nangigi ang mga igsuon sa imong partner tungod duna man sila’y kahati o katunga sa kuwarta sa ilang igsuon. Mas nindot man god huna-hunaon nga sila ang makadawat sa tanan nga ipadala sa ilang igsuon. Lisod pa nilang dawaton nga duna nay umaabot nga pamilya ang ilang igsoon nga nag-income og medyo dakodako.
Ang pagpakigbulag sa imong partner dili maoy solusyon sa imong suliran karon, kay unfair kini sa imong partner tungod kay wala siya’y sala nga nabuhat diha kanimo. Dili igo ang hinungdan aron imong putlon ang inyong maayo nga relasyon.
Mas maayo gyod nga dili lang nimo panumbalingon ang ilang mga text diha kanimo aron dili ka maapektohan. Kun puyde ayaw kini basaha.
Kun puyde imong hangyoon ang imong partner nga inig-uli niya magpakasal namong duha aron dili ka na nila mayanoyano og away kay asawa ka na man gyod sa ilang igsoon. -- Tita Salie