Dear Tita Salie,
Have a pleasant day. Just call me Jhesa, single. My problem is about sa akong lovelife. Naglibog man god ko, Tita Salie ug wala na ko masayod kun unsay maayo nakong buhaton.
Duna man gud koy uyab sulod na sa lima ka tuig. Apan nagkabulag mi tungod kay kadugo ra mi, bisan tuod nga layo ra kaayo ang among blood relation.
Samtang nagbulag mi nagkauyab pod sila sa akong kauban sa trabaho. Ug nangayo siya sa akong number didto sa iyang uyab nga kauban nako. Hangtod nga nagteksanay na pod mi.
Karon ni-court siya pagbalik nako, Tita Salie. Kay lagi love ko niya, ug sa tinuod lang love pod nako siya hangtod karon. Unsa may maayo nakong buhaton? Palihog pasabta ko. Thank you very much and more power.
* * *
Dear Jhesa,
Sumala sa atong balaod sa Civil law ug Canon law, ang sama sa inyong sitwasyon nga duna pay blood relation apan medyo layo na, mamahimo na nga minyoon. It means nga gawasnon gyod mong duha ug puyde ninyong ipadayon ang inyong relasyon.
Ang problema lang god niini kay kita wala gyod maanad niini. Labina ang atong mga katigulangan nga hilig kaayong mangig-agaw. Hilig kaayong mosubay sa atong mga kaparyentehan ug kaig-agawan. Ug sila gyod ang mag-una pagbabag kun duna sila’y makit-an nga gamay nga hinungdan ug kalambigitan sa inyong tagsatagsa ka pamilya.
Busa kun gusto ninyong ipadayon ang inyong relasyon inyo gyong pasabton ang inyong tagsatagsa ka pamilya aron dili sila lainan ug ila nang dawaton ang inyong sitwasyon. -- Tita Salie