Midayon g’yud pagkaligo’g dagat si Efren bisan og siya na lang usa kay wala man mudayon sa ilang sabot ang higala niya nga si Baste.
Nakapangandam na man gud si Efren ug nagaid na gani niya ang bag nga gisudlan sa iyang mga dad-unon sa likud nga bahin sa iyang motorsiklo. Sa huna-huna ni Efren nga panimpalad na lang ni’ng iya.
Wala ‘sab siya’y kaila nga nahuna-hunaan nga hapiton aron mag-uban sila og pangaligo sa dagat. Mi-text pag-usab si Baste kang Efren ug nangayo’g pasaylo nga dili siya makadayon sa ilang sabot kay dunay dinalian niya nga ulion sa probinsya.
Misirit si Efren pagpadagan sa iyang motor. Unahan sa Mandaue-Mactan bridge mihunong si Efren ug nagpalit og usa ka kilo nga litson, sinugba nga tulingan, ug mga puso ug softdrinks nga iyang makaon.
Mipadayon si Efren pagpadagan sa iyang motorsiklo samtang nagkisap-kisap sa kagumkom kaayo nga panit sa litson nga iyang gitilawan. Wala pa g’yud makahukom si Efren kun asa siya nga beach maligo.
Dihang nagkaduol na sa Marigondon, bisi na kaayo ang karsada kay daghan ang mga sakyanan nga mupaingon sa lainlaing beach resorts. Dunay iyang nasundan nga nagsakay og multicab nga nagtungab na gani og beer.
Diha pa mahinumdom si Efren nga wala diay siya makaplit og beer nga iyang mainum. Mihapit na usab siya og tindahan ug mipalit siya’g usa ka grande. Gibayran na lang ni Efren dala ang botelya.
Gisunod-sunod lang ni Efren ang mga sakyanan nga sigurado nga mupaingon sa mga beach resorts kay wala man siya’y puntariya nga adtoan. Nahinumdom si Efren nga kinaham niya nga kaligoan kaniadto mao ang Duawon Beach.
Apan nakadungog siya nga giilisan na ang ngalan niini karon ug gipanindot na’g maayo kay langyaw na nga nakapangasawa og Filipina maoy nanag-iya sa beach. Miuna si Efren sa hinay kaayo nga nagdagan nga mga sakyanan.
Nahinumdom pa siya sa agianan paingon sa karaang Duawon Beach. Tuod, wala siya masayop, naabot siya didto apan daku na kaayo og kausaban. Gipangutana niya ang nagbantay sa ganghaan kun wala ba siya masayop sa iyang naadtoan.
Gusto ni Efren ang Duawon Beach kay bisan og hunas ang dagat lawom gihapon ang tubig kay kantilado, dunay pangpang nga mahimo ka nga moambak.
Dili pa kaayo daghan ang cottage nga giukopar. Gipili ni Efren ang gamay’ng lamesa nga adunay atop kay duol kini sa pangpang ug makita ra bisan tua siya sa dagat. (Sumpayan)