Alas otso sa gabii, wa nay pasahero ang multicab depasaheroan nga gimaneho ni Oscar biyahe’g Danao-Carmen vise versa. Padulong na siya’s merkado sa Carmen. Naghatud siya’s katapusang pasahero sa barangay Puente nga si Mary Ann.
Bisa’g kutob ra unta siya’s merkado sa Carmen, diin naa ang terminal sa mga depasaheroan. Wa siya kabalibad ni Mary Ann nga nagpahatud. Kay duna siya’y pagtan-aw sa dalaga. Nahadlok siya’g mahiubos ang dalaga niya. Unya di unya siya atubangon kun mamisita.
Igo lang siya’ng nakasaylo sa taytayan sa sapa sa Luyang, may nasigpatan siya’ng duha ka butang nga nakapadani sa iyang pagtagad. Duha ka sapatos nga combat shoes. Mora’g botas sa ROTC. Sinaw ang itom nga panit. Mora’g brand new o bag-ong gilimpyohan. Mingaw ug awaaw ning dapita. Layo sa poste nga may sugang dagitabnon. Nasigpatan lang niya kay hayag ang dan-ag sa takdol nga bulan. Nagbarog ang duha ka sapatos sa kasadpang habig sa daplin sa karsada.
Nakahunahuna si Oscar og pahunong sa sakyanan. Kuhaon niya ang mga botas. Gamiton niya. Kun dili insakto, iyang ibaligya.
“Wa tingale ni himatikdi sa drayber sa gikargahan nga nahulo’g, tuaw niya sa hilom.
Gipadaplin niya ang multicab ug gipahunong una nasaylohan og duha ka dupa ang mga sapatos.
Giduol niya ang mga sapatos. Gisud-ong niya pag-ayo. Nagbarog ang duha ka botas. Nag-atubang sa amihan.
“Kun nahulog pa ni sila, nganong nagbarog man gyud ang duha? Mora ma’g gibutang gyud og tuyo!†sa hunahuna niya. May diyutay’ng kahibulong.
Apan naglabi gyud ang tentasyon niya sa pagkuha sa mga sapatos. Nitikobo siya kay iya nang puniton. Tagsaan niya sa iyang duha ka kamot pagpunit. Dihang usa na lang ka pulgada iyang mga kamot ngadto sa mga botas, kalit nilihok ang mga sapatos. Nilakang. Nilakaw nga daw gisul-ob og tawo nga dili makita.
“Aaaahhh!†puwerteng lisanga ni Oscar.
Nidagan siya balik sa iyang sakyanan. Nagdali’g paandar ug padagan.
Pag-abot niya’s merkado, diha pa siya huwasi sa kalisang. Naluya siya’s kakulba. Nangluspad siya. Natumog sa singot. Diha pa siya kahinumdum nga notado diay ang dapit sa taytayan sa Luyang nga hilan o hamokan. (Katapusan)