Wanted Valentina

Sa halapad nga wanang sa gipanindot na nga Plaza Independencia, miliraw ang mga mata ni Romy nga mianinaw sa tibuok palibot. Tinuod gayud nga matahom na ang tibuok Plaza Independencia! Ang mga karaang dagkong punoan sa kahoy sa sulod sa plaza, giliyokan na sa sementadong lingkuranan.

Halos nagparespares ang mga lalake ug babaye nga nagtupad og lingkod sa sementadong lingkuranan nga nagliyok sa matag punoan sa dakong kahoy. May mga batan-on nga paresan, may edaran na usab nga paresan, nga seguradong manag-uyab o managtiayon nga nagkalingaw og deyt atol sa kasaulogan sa Valentine’s Day. Namatikdan usab ni Romy niadtong orasa sa kahapunon nga daghang mga babayeng napalingi  kaniya, tungod sa gisul-ob niyang pulang t-shirt, diin sa atubangan ug luyong bahin niini, adunay giimprinta ug nakasulat sa puting titik: “Wanted Valentina!”

Tsikboy si Romy. Sa edad nga 30, nagpabilin siyang ulitawo nga buhong sa nagkalainlaing uyab. Usa  siya sa lisensiyadong arkitekto nga  may ikabuga sa pagpakigrelasyon ngadto sa mga babayeng propesyonal. Tungod sa iyang pagkapalekero, pul-anon siya sa mga babayeng iyang nakarelasyon nga pulos na niya nabugha ang mga kaputli nini. Maoy hinungdan nga atol ning kasaulogan sa Valentine’s Day, nakahunahuna si Romy og laing pamaagi aron makakaplag og bag-ong Valentina. Nagpalit siya’g pulang t-shirt, gipa-imprintahan og puting titik ang atubangan ug luyo “Wanted Valentina!”

Nahalingi si Romy, dihang may midagpi sa iyang abaga, samtang nag-inusara siyang naglingkod sa sementadong lingkuranan uban sa landong sa dakong punoan sa kahoy sa Plaza Independencia niadtong hapona.

“Hello, Romy! Mo-aplay ko nimo’g Valentina, Rom...!”

Maoy nasugat sa pananp-aw ni Romy ang usa ka puti, mestisa ug seksing babaye nga mitupad dayon og lingkod niya. Mapahiyumon kaayo ang babaye ug hilabihan ka paraygon ang tingog niini nga nagsul-ob usab og pulang t-shirt nga may imprintang puting titik sa atubangan ug luyong bahin nini “Wanted Valentino!” Seksi kaayo ang mestisa nga nagsul-ob og puting shorts nga pakigol.

“N-nakaila ka nako, Miss...?”

“Syempre! Ilado kaayo ka, Rom! Ang tsikboy nga arkitekto sa siyudad sa Sugbo! Just call me, Jeny....!”

“Wa sab diay kay Valentino, Jen....?” “Parehas ta, Rom! Aron di ta ma-firing squad, ako na lay Valentina mo, Rom, ug ikaw maoy akong Valentino....!”

“Okey, pares tang duha! Apan asa ka magpuyo, Jen....?”

“Kining dakong punoan sa kahoy nga giliyokan ning sementadong lingkoranan karon, mao ang akong pinuy-anan, Rom!”

Wala na makatingog si Romy. Kay sa usa ka pamilok, didto na silang duha si Jeny sa usa ka matahom lawak nga gilibutan sa naggilawgilaw nga bulawan. Parehas na nga hubo ang ilang kalawasan atol ning kasaulogan sa Valentine’s Day. Wa gyud magdahom si Romy nga mahatagan og katumanan ang pag-wanted niya’g Valentina, nga usa ka matahom nga engkantada sa Plaza Independencia! (Kataposan)