One night stand sa adlaw sa gugma

Samtang nagtindog sa barandelyas sa naglawig nga barko paingon sa siyudad sa Dapitan, wa damha ni Rex nga iyang ikahimamat si Jinky, ang kanhi niyang uyab sa siyudad sa Dipolog nga naminyo og usa ka negosyanteng edaran nga Australyano, nga nagtindogtindog usab sa barandelyas nga nagpahangin.

“Jinky! Ikaw gyud lagi ni! Wa dayon ko makaila nimo kay nisamot naman ka kaguwapa ug blonde na imong buhok...!”

“Uy, Rex! Ikaw man diay ni! Almost ten years na tang wa magkita. Tayming gyud nga wa  ko makalukat og plane tiket, mao nga gabarko lang ko! Musta nama ka, Rex...?”

Naminyo na ko human sa kapakyas ko’s gugma mo! Tua na ko’s lungsod sa Manukan manimuyo uban sa maestra kong asawa ug may duha mi ka babayeng anak...!”

“Sori gyud nga nagbudhi ko’s atong panumpa! Unsaon man, kagustohan sa akong parents nga minyoan ko ang senior citizens kong chatmate nga negosyanteng Australyano. Nakaanak ko’g usa ka edaran kong adunahang negosyanteng Australyano. Naharuhay na sab ang kahimtang nilang Papa ug Mama sa siyudad sa Dipolog..!”

“Duna kay business transaction sa siyudad sa Sugbo, Jink...?”

“Nagbayad ko’s napalit kong luna sa yuta, nga patukoran ko’g three-storey nga pension house! Ikaw, Rex, unsay giasikaso mo’s siyudad sa Sugbo?”

“Nanagkot ko’s akong saaran sa imahen ni Senyor Santo Niño, agi’g pasalamat sa pagka-pasar na gyud nako sa bar examination!”

“Ay! Congrats diay nimo, Atty. Rex Rafanan...!”

“Salamat, Jink! Wa gihapon mohupas ang imong kaanyag! Tuod, Valentine’s Day man diay ron! Happy Valentine’s nimo, Jink...!”

“He-he-he! Parehas nga nahilayo ta’s atong tagsatagsa ka kapikas sa dughan, Rex! Ug atol pa gyud nga nia ta’s naglawig nga barko nga nagsaulog sa Valentine’s Day! Dali, Rex, adto ta’s akong tourist cabin aron padayon tang magtsikahay...!” agni ni Jinky kang Rex nga mibitad dayon sa kamot niini.

Sa sulod sa tourist cabin ni Jinky, bugnaw kaayo ang aircon  niini. Halapad ang lawak ug ang kama niini. Maygamay’ng lamesa. May longneck nga red wine nga giplastar ni Jinky sa gamay’ng lamesa ug nakig-inom dayon siya kang Rex.

“Morag gituyo sa panahon nga magkasakay ta’s barko, Jink, ug atol pa gyud sa Valentine’s Day...!”

“Bitaw, Rex! Bisan kun aduna na tay tagsatagsa ka pamilya, apan pwede natong banhawon ning gabhiona ang duha ka gugma!! Just a one night stand...!”

“Mao gyuy gihunghong unta sa akong kasingkasing, Jink...!”

“Mao bitaw nga gidala tika nganhi sa akong cabin, kay gimingaw ug gihidlaw na sab ko’s imong romansa, Rex! Di ko hikalimtan nga ikaw ang unang lalake nga nakasiak sa akong kaputli, sa wala pa ko maminyo sa foreigner kong bana...!”

“Sige, Jink! One night stand nga romansa natong duha atol sa kasaulogan sa adlaw sa Gugma...!”

Ug mao na lamay nabatyagan nila ni Rex ug Jinky nga parehas na silang hubo og mga lawas. Gisalohan dayon nila sa pagdimdim ang dugos sa himaya, nga bisan kun dili na unta angay pang mahitabo tali nilang duha, apan gitugot sa panahon ang romansang one night stand nga hupong sa kalalim. (Kataposan)