Gula 72
Kaulanon ang panahon. Ug kadtong lagubo nga nabati ni sister Veronica maoy nakapabalik sa iyang maayong panghunahuna.
Karon si Rey maoy diha sa iyang hunahuna. Gipamalandongan niya ang gisulti ni Rey kaniya. Unta magmatinud-anon ka sa imong kaugalingon, sister Veronica. Gihinuktokan niya kini pag-ayo. Unsay buot ipasabot ni Rey sa maong mga pulong nga nalibkas gikan sa mga ngabil niini.
Sa tanto niyang paghunahuna, misantop sa iyang kaisipan ang usa ka ideya sa pagsuhid sa iyang kaugalingon. Nakaila ba gayod ako sa akong kaugalingon? Nakapangutana siya sa hilom. Unya miabot kaniya ang hunahuna sa pagtino kun unsa gayod si Rey alang kaniya. Apan maoy iyang naangkon ang kalibog. Wala siya makatugkad sa hingpit kun unsa gayod ang papel ni Rey sa iyang kinabuhi. Nakapanglingo siya. Mao pa niya madiskubrehi nga wala pa gayod diay niya masinati sa hingpit ang iyang kaugalingon.
Milabay ang usa ka semana niadtong hitaboa. Si Rey wala motungha sa Orchids Sister’s Convent. Apan sulod sa maong gidugayon, wala’y puas ang pagtawag niini kang Veronica sa telepono. I-atol ni Rey ang pagtawag sa kombento sa udto ug sa gabii. Makasulti niya og dugay ang madre. Apan sa telepono, mga partikular nga butang lang ang ilang gihisgotan. -- Sumpayan pa