Klasmet sa law school ang bana’g asawa nga sila si Dante ug Alice. Abogado’g abogada na sila karon. Sa estudyante pa, uyab na sila daan. Ug nagkadayon gyud. Sulod sa napulo ka tuig sa ilang kaminyoon, niaslom ang tinagdan nila sa usa’g usa. Kay si Dante, tapulan nga pagka-abogado. Gustong sa opisina lang pirmi mag-estambay.
Dili gustong motambong og hearing. Palahubog ug himabaye pa gyud. Samtang nisikat si Alice kay maayong manglaban, nagkaawop ang ngalan ni Dante sa natad sa pangabogar. Duha ang ilang anak. Ug nagkaanam na’g kawala ang respeto sa amahan. Tua nasuod sa inahan nga maoy nagtinarong sa kinabuhi.
Niabot ang higayon nga dakong kaso nga kontrobersiyal kaayo, ang nagunitan ni Alice. Daghan siya’g death threats. Gihatagan siya’g bodyguard sa husgado. Ang nahimo niyang bodyguard, dako’g ranggo sa military. Graduwado sa PMA si Major Kevin Diaz. Ligdong ug macho nga pagkalalaki. Tungod kay nagsigi sila’g kuyog, nagkasuod. Ug nagkasayranay nga wala na sila’y maayong relasyon sa tagsatagsa ka kapikas.
Nagduda na si Dante nga may relasyon na ang Major ug iyang kapikas. Giadto sab ni Dante ang asawa sa major nga si Janice. Silang duha naniid kun asa manuroy ang ilang tagsa ka kapikas.
Niabot ang higayon nga nadapatan ni Dante si Alice tungod sa iyang kahubog ug pagka wa na gyu’y gugma nila sa usa’g-usa. Nagpaanular sila sa kasal. Naanular. Giagni ni Dante si Janice nga magpaanular sab sila’s kasal sa iyang bana. Naanular sab. Ug nagkasabot sila’s Janice ug Dante nga mao na say magpuyo. Nagpuyo na sab sila’s Kevin ug Alice. Sigi pa ang kasong kontrobersiyal. Kay tungod sa kahinay motuyok sa ligid sa hustisya, way kasong madali. Apan ang wife/husband swapping kay dili tantong kontrobersiyal, nauna’g kahuman. (Kataposan)