Kinsa si Santa Claus

Nahigmata sayo sa buntag si Cristobal sa kasaba sa gawas sa lawak sa 4 anyos niyang anak nga si Clipoy nga nagluksolukso sa kalipay nga nagbitbit sa mga dulaan nga iyang gikuha gikan sa sulod sa midyas nga iyang gibutang sa may pultahan sa  gawas sa ilang panimalay sa miaging gabii.

“Yhee heee!!!,” ni Clipoy pa nga nagdagan paingon sa iyang inahan nga nagluto sa kusina alang sa ilang pamahaw. “Tan-awa Mommy, gihatag gyod ni Santa Claus ang tanan nakong gipangayo gabii.”

“D-diay ba, Nak?” ni Mercy pa nga nakapahiyom nga nagtan-aw sa iyang anak. “Giunsa man na nimo pagpangayo kang Santa Claus?”

“Ning-ingon lang ko Mommy,” gisubli ni Clipoy sa pag-asoy ang iyang gibuhat sa miaging gabii sa dayon na niyang katulog.” Santa Claus, mangayo kog Pinaskohan nga mga toys, kanang mga super hero nga Batman ug  Superman. Unya butangi lang pod og daghang candy ug tsokolet ha,  Santa Claus kay ako man pod  ipanghatag sa mga bata nga among silingan.”

“Mao diay,” ni Mercy  pa ngadto sa iyang anak. “Gihatagan ka ni Santa Claus kay dili man lang imong kaugalingon ang imong gihunahuna. Giapil pod nimo ang mga bata natong silingan.”

“O Mommy, “ dali nga tubag sa bata ug nagdali kini paggawas sa ilang balay ug gitawag ang mga bata nga ilang silingan ug gipanghatag ang candy nga gihatag kaniya ni Santa Claus.

Giduol ni Cristobal iyang asawa nga nagluto sa kusina nga nagpaminaw lang sa bata nga gisulti kaniya.

“Asa na man tong imong anak nga mikarag man lang to og gawas,”  nagkanayon si Cristobal ngadto sa iyang asawa.

“Ay, da,”   ni Mercy pa. “Tua sa gawas  nagdala sa candy nga gihatag kaniya ni Santa Claus kay iya kuno tong gipangayo gabii para sa mga bata nga atong silingan.”

“Mao ba?” Nahikatawa si Cristobal nga naminaw sa gipamulong sa iyang asawa. Gitinuod gyod diay niya ang iyang gisulti kagabii sa iyang pagpangayo og Pinaskohan nga mga dulaan ni Santa Claus.

Nunot sa mao nilang panagsulti ni Cristobal maoy mipasunding sa iyang hunahuna ang mga panghitabo usab sa panahon pa usab sa iyang pagkabata.

“Tay,” nakapangutana si Cristobal kang Tatay niya Baresto. “Si kinsa man diay na si Santa Claus?”

“Nganong nakapangutana ka man niana anak,?” ni Baresto pa nga daw gibati og kahibulong sa gipangutana sa iyang anak.

“Kay dihang nakigsinukmagay ko kang Botoy nga bata nga atong silingan wala na man ko niya hatagi og Pinaskohan, ” nagkanayon si Cristobal.

“Nganong nakasulti ka man nga wala na ka hatagi og Pinaskohan ni Santa Claus,” sumbalik og pangutana ni Baresto sa iyang anak.

“Ang-ang nga imbes Pinaskohan iyang isulod sa midyas nga akong gibutang sa gawas sa pultahan sa atong balay,” nagkanayon si Cristobal sa pagtubag. “Ang gamay man nga papel nga dunay sulat ni Santa Claus ang akong nakuha.”

“Mao ba?” ni Baresto pa nga daw seryoso ang nawong nga nakigsulti kang Cristobal nga  iyang anak. “Unsay gibutang ni Santa Claus sa iyang sulat.”

“Matud pa sa iyang sulat, Tay, ay. “Pinangga nako ang batang buotan ug dili ko gusto sa batang maldito ug walay Pinaskohan gikan kanako nga madawat.  Merry Christmas na lang Cristobal. Your’s Truly,  Santa Claus.”

“Kun mao,” ni Baresto pa nga mitan-aw kang Cristobal. “Kun mohingkod na unya ang imong panuigon ug makabaton ka na usab og kaugalingong anak, mahibaw-an na unya  nimo kun  kinsa si Santa Claus.” (Katapusan)