Human makapanglampas sa mga sagbot sa iyang uma sa banika, gisakub dayon ni Eddie ang iyang sundang sa sakuban niini nga gitakin sa iyang kilid. Unya, misuot siya sa siot ug labong kakahuyan sa atbang aron mangihi. Human makapangihi, nahaungot ang panan-aw ni Eddie sa iyang nakita duol sa iyang gitindogan.
Klarong nasugat sa iyang panan-aw ang balay sa tambayawan, nga adunay langgam nga nasangit. Abtik nga miduol si Eddie sa balay sa tambayawan. Buhi pa ang langgam manatad nga maayong pagkaputos ang lawas sa balay sa tambayawan.
Nagpitokpitok ang mga mata sa manatad nga dili na gayud makalingkawas sa pagkasangit sa balay sa tambayawan. Samtang ang tambayawan nga dalag ug itom ang kolor, abtik nga nagkamangkamang sa iyang balay nga daw naniid sa manatad.
Nakapamalandong si Eddie nga padayong nagsud-ong sa manatad nga nasangit sa daw gapas nga balay sa tambayawan.
“Talagsaon kining gidangatan sa manatad ug panagsa da kining mahitabo nga makakubit ang balay sa tambayawan og langgam. Hmm, maayong kuhaan kini og tangil sa akong panudsod sa dagat....!†gibati’g kalipay si Eddie nga daw nakigsulti sa iyang kaugalingon. Duha ang panginabuhian ni Eddie nga iyang gibuhi sa bag-o lang niyang gipakaslan nga si Manda. Panguma ug panudsod. Ang iyang uma sa banika, maoy gisaligan ni Eddie sa abot sa iyang kamaisan, utanonan, prutasan ug mga lagutmon. Ang pagpanudsod mao usab ang gisaligan ni Eddie sa ilang panud-an ni Manda. Apan pipila na ka higayon nga gidimalas si Eddie sa iyang panudsod sa dagat sa taga hawak nga tubig. Pirme na nga way sulod ang dala niyang bukag. Wala na siya’y makuhang mga isda.
May nahunahunaan dayon si Eddie. Gikuhaan niya’g balhibo ang manatad, lakip ang kuko sa tiil niini. Gikuhaan sab niya ang daw gapason nga balay sa tambayawan. Unya, hinay niyang gidakop ang tambayawan ug giputlan ang mga kuyamoy sa kasway niini. Gikuha ni Eddie ang iyang panyo ug giputos ang balhibo sa manatad, kuko sa manatad, gamay’ng bahin sa balay sa tambayawan ug ang mga kasway sa tambayawan. Dayon, gibuhian ug gipalupad ni Eddie ang manatad, lakip na ang tambayawan nga abtik mikamang sa balay niini. Pag-abot sa ilang balay, giputos dayon ni Eddie sa gamay’ng panaptong pula ang himan sa himuon niyang tangil sa iyang panudsod. Pagka-kaadlawon, nananghid dayon si Eddie kang Manda nga manudsod na usab siya sa taga hawak nga tubig sa dagat. Buot subhan ni Eddie ang gihimo niyang tangil sa panudsod!
Sa una pa lang gani nga sandak ni Eddie sa iyang sudsod, nabatyagan niya ang anino sa mga isda nga nasangab sa iyang sudsod. Sa unang pagtaktak ni Eddie, hilabihang daghanang kalidades nga isda nga nakuha sa iyang sudsod. Unang higayon nga napuno dayon sa mga isda ang dala niyang bukag, nga sagad kun debuynason siya kanhi, dili gani matunga sa mga isda.
Nagbaguod si Eddie sa dala niyang bukag nga napuno sa isda sa iyang pagpauli. Nakapahiyom siya. Malipay na niini si Magda. Karon, mituo na gayud si Eddie nga misalir ang iyang tangil sa panudsod -- sa manatad nga nasangit sa balay sa tambayawan! Ug mapahimuslan pa niya kini sa umaabot nga mga adlaw. (Kataposan)