Mananaygon

Human sa ilang pagpangaon ni Robert ug sa duha ka mananaygon, nanggawas sila gikan sa fast food restaurant. Gidala ni Robert sila si Felomina ug ang apo niini nga si Marilyn ngadto sa iyang kotse nga giparada atbang sa estasyonan sa Bombo Radyo.

“Dili kaha kami mauwaw didto sa imong gipuy-an sir,”matud ni Felomina. Gipasabot si Robert sa tiguwang nga sila nga taga probinsya maikogon g’yud kaayo, ilabi na kun makita nila nga ubos ra sila’g kahimtang. Misamot nga taas kaayo og pagsud-ong si Felomina kang Robert dihang nagsakay na sila sa awto sa ulitawo paingon sa balay niini sa V. Rama Avenue. “Sukad-sukad sa akong pagkabata sir karon pa gayud tawon ko makasakay og awto. Kanindot ba diay ani sakyan,” ni Felomina pa.

Naghilom lang si Marilyn apan gipasiplatan siya kanunay ni Robert pinaagi sa front mirror nga nagsigi’g sud-ong sa mga dapit nga ilang malabyan. Taud-taud, miabot na sila sa usa ka dapit sa V. Rama Avenue ug gipahunong ni Robert ang awto.

Nanaug si Robert ou gibuksan ang gate sa ilang balay aron makasulod ang awto sa grahe. Si Robert pa gani ang misirado sa gate dihang nakaparking na ang kotse sa grahe. “Dali panganaug na mo Lola... Lyn,” gibuksan ni Robert ang pultahan sa awto.

Miliraw ang mga mata sa duha ka mananaygon. Daku man diay kining imong balay sir,” matud ni Felomina. “Mao kana ang rason nga gidala ko kamo dinhi aron nga makatabang kamo nako nga nag-inusara pagpuyo dinhi sa balay human mamatay ang akong inahan,” ni Robert pa.

Gisuginlan ni Robert sila si Felomina ug Marilyn nga aduna sila’y katabang apan mipauli ug wala pa mobalik pagkamatay sa iyang inahan. Gialinan ang katabang nga dalaga nga sila na lang si Robert sa balay.

“So, kadto na’y atong sabot Lola nga tabang-tabangan ko ninyo dinhi pag-atiman sa balay ug ako nay bahala sa kwarta nga inyo unta nga kitaon sa usa ka buwan nga pagpanaygon dinhi sa dakbayan,” giingnan ni Robert si Felomina.

Gitudloan niya kini sa kwarto nga ilang estahan. Nahimutang kini tupad sa kwarto sa ilang katabang. “Sus, kining kwartoha sir nga paestahan nimo namo, daku pa ni sa among balay didto sa Barili,” matud ni Felomina.

Gibiyaan ni Robert ang apohan ug ang iyang apo. Misulod si Robert sa iyang kwarto. Sa hilom nakadayeg siya sa apohan ug apo nga sa iyang tan-aw mga buotan. Labaw na nga nakadayeg si Robert sa kaanyag ni Marilyn nga milutaw g’yud bisan og wala siya’y pangarte sa kaugalingon. – Sumpayan