Bag-o pa nga naminyo si James, 29- anyos ang panuigon sa iyang asawa nga si Milanie, 29-anyos usab ang panuigon sama kaniya. Nagpuyo sila tipon sa iyang ugangan sa barangay Magallanes sa dakbayan sa Tacloban ug sa ilang panagtipon isip magtiayon nagbunga usab ang ilang panaghigugmaay nga si Baby Jay nga nahimugso napulo pa ka bulan ang nakalabay.
Matud pa ni James dihang gikataho ang umaabot nga super typhoon nga Yolanda sa Philippine Atmospheric Geophysical and Astronomical Services Administration (Pagasa) wala gayod sila makahunahuna sa pagbakwit gikan sa ilang balay nga gipuy-an nga ginama sa light materials sa pagtuo nga ang super typhoon nga bagyong Yolanda hangin lamang dad-on niini nga mokusokuso sa ilang dapit.
Dugang pa niya nga wala pa sila makapamahaw kay alas siyete sa buntag pa dihang nagsugod na sa paghapak ang naghagiyos nga bagyong Yolanda ug ilang namatikdan nga nagdala kini og dagkong balud nga nakaaghat kanila sa pagpanggawas sa ilang balay uban sa iyang asawa ug ugangan nga babaye ug lalaki.
Gikugos niya ang iyang anak nga si Baby Jay ug naggunit kaniya iyang asawa ug nagsunod usab kanila ang iyang ugangan nga babaye ug lalaki sa tinguha sa pagbakwit og taas ngadto sa taas nga lugar.
Naghadyong ang kusog kaayong hangin nga moigo sa tibuok dapit sa dakbayan sa Tacloban nga giubanan sa higanting mga balud ug wala na niya igkita ang iyang asawa ug ugangang lalaki ug babaye nga nagsunod kanila.
Matud pa ni James nga katapusan niyang namatikdan nga naggunit pa gihapon siya sa iyang anak nga naglangoylangoy taliwala sa dagkong mga balud hangtod nga nawad-an siya og panimuot.
“Mga alas onse na sa buntag ko nga nakamatngon nga gidagsa sa baybayon,†James pa nga nagpatulo na lamang sa iyang mga luha sa pagsugilon sa tigbalita nga nakighinabi kaniya. “Wala na nako makita akong asawa ug anak ug akong ungan nga babaye ug lalaki.â€
“Sa sinugdanan daw wala gyud ako batia og kagutom,†dugang pa niya. “Milinaw na ang hangin ug mibalik na usab ang dagat sa iyang naandan nga kahimtang.â€
Dugang pa ni James nga maoy una niyang gihimo ang pagpangita sa iyang mga mahal sa kinabuhi sa palibot sa dakbayan sa Tacloban ug nakita niya ang daghan na nga mga patay apan wala’y usa kanila nga iyang nakita.
Dili tiaw ang gibating kaguol ni James nga naghunahuna sa iyang mga minahal sa kinabuhi maoy hinungdan nga wala gayud siya mohunong sa pagpangita. Ug sa ikatulong adlaw sa iyang pagpangita iyang nakaplagan ang iyang ugangang lalaki ug babaye nga pulos na patay nga gidagsa.
“Bisan asa na lang ko paingon sa pagpangita ug gibati na nako ang kagutom ug kauhaw nga daw nagkapawong na ang akong panan-aw,†dugang pa niya.
Sa tuyo nga mahibalik iyang kalagsik sa lawas maoy iyang gihimo sa pagpangita og makaon ug mainom hangtod nga diha’y mihatag kaniya og pagkaon ug tubig nga nakatambal sa gibati niyang kagutom ug kauhaw.
“Nagpadayon ko sa pagpangita,†dugang pa ni James. “Sa mga patay ug sa mga buhi nga nagtapok apan wala ko na gayod sila igkita ni panapus sa pamahayag ni James nga daw natuk-an sa pagsulti tungod sa iyang pagbakho nga daw nawad-an na og paglaum nga makaplagan pa iyang asawa ug anak nga buhi.