Moadto ko sa Tisa. Maoy akong target ang balay nga among gipuy-an ni Elizar sa una dihang nagtungha pa lang kami sa college. Adto lang una ko mopuyo kun dunay lawak nga bakante. Ako kining abangan.
Miabot ang jeep sa kilid sa Patria de Cebu nga atbang sa Cebu Metropolitan Cathedral. Wala nako tuyoa nga pagkahitungod gyud nako sa Cathedral paspas kaayong nangambak ang akong mga luha. Tungod kay maulaw ko nga magsige og lakaw nga naghilak, nakahukom ko nga mosulod una sa simbahan sa Cathedral.
Samtang nagsaka ko sa mubong hagdanan paingon sa pultahan sa maong simbahan, maoy misugat sa akong panan-aw ang usa ka hamtong nga lalaki nga gikan sa sulod sa Cathedral.
“Ate Maria...!†nagkanayon ang lalaki.
Si Dodong diay, ang akong igsuon nga misulod sa seminaryo.
“Uy, Dodong, ikaw man diay?†Ug misamot pagdaghan ang mga luha nga midagayday sa akong mga mata.
Pito na ka tuig ang milabay sukad nga wala mi nagkita sa akong igsuon nga si Dodong. Pagsulod niya sa seminaryo sa Manila, gipadala man dayon siya sa usa ka mission area sa Jamaica. Ug karon pa kami nagkita pag-usab.
Walay kabutangan ang kalipay nga akong gibati, tungod kay halos gibawi na ang tanang mga tawo nga nahilambigit kanako. Aduna pa ako’y mga ginikanan apan nasayod ko nga masuko gyud sila kanako kun ilang masayran ang nahitabo. Ug karon si Dodong na lang ang akong puweding masumbongan. -- Sumpayan pa