Napasiga ang mga mata ni Miguel pagkakita sa babaye nga nagbarug tupad sa iyang inahan. "Luz! Nabuhi ka?" singgit ni Miguel nga sa walay langan-langan migakus dayon sa babaye nga wala magtingog ug igo lang miduko.
"Miguel, dili kana siya si Luz. Ang kaluha siya ni Luz nga si Lucy. Sori lang kaayo day ha, nakalitan lang g'yud si Miguel kay pinangga man gud kaayo niya ang imong kaluha," matud sa inahan ni Miguel nga migunit sa bukton sa iyang anak.
Nakahilak si Miguel atubangan ni Lucy ug sa mga ginikanan ni Luz. "Walay problema Miguel. Maayo hinoon nga nasayud ko nga daku g'yud diay kaayo ang imong gugma sa akong kaluha," matud ni Lucy.
Human makapangadye sa lubong ni Lucy, miagda na ang inahan ni Miguel nga mamauli na sila sa balay. Naghilak pa gihapon si Miguel nga mora na'g adis-adis ang dagway tungod sa tag-as niya nga buhok ug sa iyang bangas.
"Pag-una lang kamo Ma, magpabilin lang usa ko dinhi," giingnan ni Miguel ang iyang inahan. "Ubanan ko lang si Miguel dinhi sa menteryo Ma, Pa," giingnan ni Lucy ang iyang mga ginikanan.
Nagsultihanay sila si Miguel ug Lucy. Takulahaw lang nga anam-anam nga mibalik ang kamaya sa dughan ni Miguel nga nakita niya si Lucy. "Wala ka g'yuy kalainan og ni Luz, gwapa ka 'sab Lucy," giingnan ni Miguel ang kaluha sa iyang asawa.
"Kun gwapa pa ko Migz wala pa man lagi ko maminyo," komedya ni Lucy. "Maayo kay wala mouban ang imong boyfriend pag-anhi sa Cebu," ni Miguel pa. Mingisi si Lucy ug mitug-an nga wala pa siya'y boyfriend.
Ang gitug-an ni Lucy maoy nakapahiyom kang Miguel. "Tinuod ka? Dili tingali ikasuko sa imong kaluha kun mobati ko og kaibog nimo Lucy kay wala ka g'yuy kalainan kaniya," matud ni Miguel.
Mitutok si Lucy kang Miguel. "Pwede ra 'sab nato nga hangyoon si kaluha nga ako na la'y mohulip sa naputol niya nga pag-alagad kanimo," ni Lucy pa. Sa makausa pa gigakus g'yud dayon ni Miguel si Lucy.
"Salamat, salamat kaayo Lucy kun mao kana. Bisan tuod og patay na si Luz apan susama ra nga buhi siya gihapon kanako kay anaa ka man," matud ni Miguel. Gitutokan sila sa mga tawo nga nanagkut usab sa mga lubnganan sa ilang minahal.
"Anha na lang ko nimo Migz kay nakita nako nga ang daku nimo nga gugma sa akong kaluha, itakli ra nimo kanako," matud ni Lucy.
Mipauli si Miguel sa ilang balay nga puno na sa kamaya ang panagway uban ni Lucy. - Kataposan