Si Trina usa ka probinsiyanang babaye sa Cagayan de Oro City. Miyembro sa usa ka Sorority ug hanas sa paggamit og scalpel. Naminyo siya og usa ka Sugbuanon. Maayo ang ilang pagpuyo sa sinugdanan apan pagkabat sa tulo ka
buwan nagkagubot ang maong pamilya tungod sa apuhan sa iyang bana.
Tungod sa kagubot nga nahitabo nakuha ang tulo ka buwan niyang gisabak. Didto nahibaw-an ni Trina nga ang apuhan diay sa iyang bana usa ka ex-convict. Nakaingon si Trina sa iyang kaugalingon nga mipalayo man galing siya sa ilang dapit apan bisan diay dinhi sa Sugbo, aduna pa gayod sad diay siya’y angayang tapuson.
Sa pagkakaron dili na siya manginlabot apan kung aduna na gayoy mahitabo sa iyang bana o maski apilon na siya sa away dili na gayod siya magpakahilom, siya na gayod ang mukitil sa kinabuhi niining ex-convict nga apuhan.
Nausab ang kagubot sa ikaduhang higayon. Ang bana ni Trina maoy gitiunan og pistola. Si Trina nagpakahilom apan misugyot nga patyon na lamang ang apuhan sa iyang bana daw magbayad na lamang og tawo. Apan misupak kini sa maong desisyon.
Namalhin sila sa laing lugar ug nagpuyong malinawon apan bungkag ang maong pamilya sa iyang bana. Matud pa nila hulaton na lang ang saktong panahon. Pero alang kang Trina kanus-a pa kaha ang giingong saktong panahon unya na kung adunay usa kanila nga mamatay.
Mikabat na pud og laing usa ka buwan ang maong sitwasyon. Gipalurang una nila ang maong problema. Apan sa huna-huna ni Trina hangtud kanus-a sila mag-antos ug magtago-tago tungod niining maong hitabo. Kinahanglan na niyang patyon ang ex-convict nga apuhan gamit ang iyang scalpel kay sigurado gayod nga wala’y sipyat ang kamatayon niini.
Usa ka gabii niana gituyo ni Trina nga magpagabii gayod sa pag-uli. Miagi gayod siya sa daruhan kung diin permanenting magtugway sa baka ang ex-convict. Gibutangan niya og scalpel ang maong dapit aron aksidenteng mayatakan kini sa maong apuhan daw mutaop diretso sa tuhod niini.
Ang maong scalpel adunay gibutang nga makahilo aron inanay nga mamatay ang masamad niini. Ug sa wala damha ang maong apuhan nga ex-convict namatay gayod nga sa ilang tan-aw walay balidong rason ang kamatayon niini tungod kay lagsik pa man intawon ang maong tiguwang sa milabay’ng mga adlaw.
Mao kana si Trina, seryoso, adbenturoso apan hilom nga mopatay og tawo. Wala’y laing nasayod kabahin niini kun dili mao ra ang mga sakop sa Sorority didto sa Cagayan de Oro. Sa kadaghan sa napatay’ng sagbot sa katilingban dili na gayod siya mahadlok sa pagbuhat niining maong matang bisan tinuod usa kini ka dautang binuhatan apan mao kini ang pamaagi sa pagtapos sa mga dautang ihemplo sa kanasuran. (Katapusan)