Sobra kaabubhoan si Nicole. Kanunay silang mag-away sa iyang bana nga si Abner tungod sa pangabubho. Kun dugay mahiuli si Abner gikan nga mag-duty gubot gyod ang resulta.
Hinuon, dili gyod kalikayan nga mangabog si Nicole kang Abner kay gawas nga dako’g suweldo sa PNP, P/S Superintendent gud ang iyang ranggo, ambongan pa gyod, taas og barog ug angayan kaayong mag-uniporme ug magtakin sa iyang serbis nga .45 nga pistola. Mora siya’g si Kirk Douglas, kadtong artista sa Hollywood nga hanas kaayong moibot sa iyang pistola.
Duha nay ilang anak ni Nicole ug Abner. Mga gagmay pa kini. Si Abner Jr. 8 pa lang ang panuigon, samtang si Bianca 7 pa lang ka tuig.
Apan ang bunhok sa pangabubho kanunay’ng nanguyamang sa galamhan ni Nicole. Labi na’g makabati siya’g estorya nga si Abner adunay babaye didto, nga si Abner dunay kerida diri, daw mosilaob ang iyang dughan sa kasuko ug mosamot hinuon ang iyang pangabubho.
Kanang inig-uli ni Abner gikan sa duty, usisahon gyod ni Nicole ang uniporme niini kun wala bay lipstik nga namilit sa abaga niini o kaha buhok sa babaye nga mitapot nga mahimo niyang ebidensya.
Ug dili lang kay kini ra ang buhaton ni Nicole. Ilakip pa niya pagsusi ang brief ni Abner kun wala bay baho sa laing babaye. Kun makapanimaho kaha siya sa baho nga dili iya, sikwate ka gyod Abnera ka. Kadtong bana nga magpasagad lang unya sa ilang mga bisyo labi na sa pagpamabaye, aw, maoy pagaingnon nga wala maayong pagka dispoga kay nakita ang tahi.
Ingon niini ang gibati ni Nicole. Pangabubho nga wa gyu’y hinungdan. Maayo man gani kay si Abner wala mohatag og bili niining tanan. Nakasabot siya sa gibati sa iyang asawa.
“Naunsa na man tawon ka, day, sobra ra man kaayo kining imong pangabubho?†usa ka higayon giingnan ni Abner ang iyang asawa.
“Dili ko lang tuyoon nga mangabubho ko nimo. Nahadlok ko nga magbinuang ka sa laing babaye,†nagkanayon si Nicole.
“Dili na mahitabo, Day, kay ang akong gilantaw ikaw ug ang atong mga anak nga kahatagan ko kamo sa maayong kaugmaon. Labaw sa tanan, ang akong katungdanan nga dili kamansahan lakip ang akong nga’n ug bansagon,†matinud-anon nga pulong ni Abner ug gipatikan niya’g halok ang aping sa asawa.
“Hinaot pa unta, Abner!†Ug nanulod sila sa kuwarto nga gihabolan sa bantok nga kahilom. (Katapusan)