Ang mga tawo nga nasayod sa kaagi sa akong kinabuhi, sa akong kakundatan, ingon sa dili makatuo nga nagtarong na ako sa akong kinabuhi. Nakadungog ko’g mga hungihong nga may mga tawo nga nagduda sa hinungdan nganong magkanunayan ko sa simbahan ug sa kumbento. Nagtuo sila nga ako nagpa-charming ngadto sa ambongan namong kura paruko.
May mga tawo sab nga nanental nako aron motaak pagbalik ngadto sa lapok sa pagpakasala. Gusto nilang pukawon ang nahikatulog na unta nakong kahigal. Gusto nilang sa makausa pa, mugahom kanako ang kahidlaw sa lawasnong kalipay nga miulipon kanako sa nakalabay nga panahon. Usahay, matandog ang akong kahuyang.
Usa sa nanental nako mao si Raffy, driver sa among kura paruko sa parokya sa Barili. Sa iyang sinultihan, maila ang iyang kapalikero. Pero may usa ka butang nga nakapa-attract ni Raffy kanako. Ang iyang karisma. Gaan kaayo ang akong buot ngadto kaniya.
Nangulitawo siya nako pero nagdumili ko pagdawat sa iyang gugma. Nahadlok ko nga tingali’g adunay moabot ug magpaila nga asawa. Kay dili ra ba katuohan ang estorya ni Raffy bisan kun miingon siya nga wala siya’y asawa. Dili na ko gustong mahiagom pag-usab sa komplikasyon ang akong kinabuhi. -- Sumpayan pa