Sa unang pagkakita nako ni Noy Jack, apprentice mate pa ko sa m/v Zarembo nga biyahe’g Cebu-Manila vise versa. Isip agregawo, nag-sideline ko pagka-purser kay aron dunay suweldo. Abi nako og abogado si Noy Jack.
Abogado gyud iyang barog. Maayo modala og sapot. Tigsul-ob og long sleeve nga polo. Tigbitbit og attaché case. Unya nagbitbit siya og Bill of Lading diha sa pantalan sa Manila. Gitunol niya nako ang papel kay nangolekta na ko’g bill of lading para sa akong cargo report nga gisugdan og himo, para sa pantalan sa Cebu.
“Ikaw si Joaquin Pitlag?†nako pa nga nibasa sa ngalan sa Consignee sa Bill of Lading.
“O, ako brod. Apan tawga la’g Jack, brod†niya pa.
Wa lang ko nipalag nga gi-brod ko niya. Kay bisag 19 pay edad nako adtong higayona, mora na man kuno ko’g trayenta. Nabasa nako nga dry goods iyang kargamento. Tall, dark and handsome si Noy Jack sa akong tan-aw. Apan nadaut lang iyang hitsura kay dunay plaster iyang tuong mata. Abi nako og gipiskat lang siya.
Ikaduhang kita namo ni Noy Jack, pagkasunod bulan. Binulan diay iyang sakay sa barko dala ang pagkarga og mga dry goods. Nagduda ko nga namalit siya sa Baclaran, Divisoria ug Tutuban. Kay barato man kuno didto ang mga dry goods. May plaster lang gihapon iyang tuong mata. Nahibulong ko nga dugay naayo iyang piskat.
Sa ikatulo namong kita, naanad na lang ko sa plaster sa iyang mata. Nakahukom ko nga one-eye-Jack gyud siya.
Duha ka tuig ra kong naagregawo. Mokuha na unta ko’g board exams pagka-third mate. Apan nausab ang akong hunahuna. Wa koy ganang matiguwang nga usa ka seaman. Gusto lang ko’g trabaho sa opisina sa mamala. Nibisita kong papa Terio sa iyang opisina isip cashier sa Register of Deeds sa Kapitolyo. Kay ipaila ko niya’s iyang higalang abogado nga nagkinahanglan og clerk. Ug takulahaw lang nagkita na sab mi ni Noy Jack.
“Jack, si Rudy, akong kinamaguwangang anak lalaki,†ni papa.
“Imong anak si Purser Rudy?†ni Noy Jack nga niabli sa iyang attaché case ibabaw sa lamesa ni papa. Mga nindot nga tila ang sulod. Dinha pa ko kahibawo kun unsay sulod sa iyang attaché case. Suki diay ni Noy Jack ang mga empleyado sa Kapitolyo ug City Hall sa pautang sa tela ug mga RTW.
“Nibalhin ka’g barko? Bantog rang wa na ta magkita sa barko†ni Noy Jack.
“Nanaug ko. Kay moeksamin unta’g third mate. Apan nakahukom kong mokuha’g laing kurso†nako pa.
“Giingnan ko siya nga kun mokuha siya’g laing kurso, mag-self-supporting na lang siya. Magtrabaho maadlaw. Moeskuyla magabii. Di nako kayang gastohan. May walo pa siya ka manghod gastohanan nako†ni papa.
“Ako, doble na gyung paningkamot. Kay tulo na akong college†ni Noy Jack.
“Unsay mga kurso nila?†ni papa.
“May computer engineering, medicine ug law†ni Noy Jack.
“Yati ra gud?†ni papa.
“Bilib ko nimo, Noy Jack. Pautang-utang la’g tila ug RTW. Unya nagtungha’g mahalong mga kurso ang mga anak†nako pa.
Nakapahiyom si Noy Jack.
“Basta magtinarong lang sila’g eskuyla. Bisa’g igo lang pasar, gastohan nako. Kay investment man ang mga anak. Apan ang di gustong moeskuyla, di na lang sab nako pugson. May duha ko ka anak nga mao na lay nangolekta sa uban nakong kolektahunon,†ni Noy Jack. Gitarong niya iyang shades nga dugang pugong sa plaster sa iyang mata.
Nahimong inspirasyon nako si Noy Jack. Bisa’g kabugalbugalon unta ko niya sa una. (Katapusan)