Dihang gisuginlan nako si Papa Juan sa gikasabotan namo ni Daniel, misugyot ang akong amahan nga labing maayo nga adto kami magtukod og balay sa Ginatilan. Kay may bahin man si Papa didto gikan sa iyang mga ginikanan ug maayo kining tukoran og balay.
Gisusi dayon namo ni Daniel ang maong dapit. Nakauyon siya sa lugar, partikular na ang luna sa yuta nga maoy tukoran sa among balay. Mao nga nakahukom kami nga sa maong luna gyud magtukod og balay. Namalit dayon kami’g materyales ug gipasugdan gilayon ang pagpatukod sa balay nga kongkreto apan igo-igo lang ang gidak-on.
Samtang nagpadayon ang pagtukod sa among balay, nangaplay si Daniel og trabaho. Miadto usab siya sa usa ka agency aron mo-apply sa abroad og trabaho. Graduwado usab siya og SPED ug puwede siyang magtudlo sa mga abnormal. Dili siya maglisod pagpangita og trabaho.
Gikinahanglan namo ang dugang kuwarta kay nagplano kami nga inigkahuman sa among balay, magbukas kami’g tindahan ug mopalit og jeep nga pasaheroan.
Hapit na mahuman ang gipatukod namong balay sa dihang gitawagan si Daniel sa agency nga iyang giaplayan. Naaprobahan ang iyang application ug kinahanglang mo-report siya sa labing daling panahon sa buhatan sa maong ahensiya. Mao nga nagdalidali siya sa pagpangandam paglarga paingon sa kaulohan.
“Ikaw nay bahala dinhi, ha,†ni Daniel sa dayon niyang larga paingon sa Manila.
“Ayaw kabalaka,†matud ko. “Ako nay maantigo dinhi.†-- Sumpayan pa