Dear Tita Salie,
Have a nice day. Just call me, Laika, 16 years old ug nagtungha diri sa Maguikay, Mandaue City. High school pa lang ko apan duna na koy hinigugma, nga ako ra usab kauban sa klase, akong classmate ang akong uyab, Tita.
Sa una dihang bag-o pa lang ang among relasyon loving ug sweet kaayo ming duha ug kanunay gyud ming magkuyog. Bisan asa ko moadto iya gyud kong ubanan permi. Tawgon gud siya og school bus sa among barkada kay hatid-sundo man ko niya.
Apan samtang nagkadugay ang among relasyon, nag-anam-anam usab og kausab ang iyang batasan ngari kanako. Dili na siya kanunay mokuyog nako ug iya lang ko nga pasagdan kun asa ko gusto molakaw, ug ang iyang barkada ang permi niya kauban.
Nalingaw na siya sa iyang barkada ug baliwala na lang ko niya, Tita. Wala na kaha siya’y gugma nako kay dili na man siya kanunay anaa sa akong kiliran sama kaniadto.
Unsa may akong buhaton karon, Tita? Ako na lang ba siyang bulagan? Palihog pasabta ko. Thank you so much and more power.
* * *
Dearest Laika,
So you are sweet 16. Are you really in love? Kahibalo ka nindot kaayo ang ma-inlove kay full of colors gyud ang imong world especially if you are happy with the man that you love. Pero kun wala gani mo sa maayong relasyon wala’y gana ang kinabuhi.
Bata pa kaayo mong duha Laika, ang nahitabo sa inyong relasyon nagtimaan lamang nga dili pa committed ang imong boyfriend. Wala pa sa iyang hunahuna ang commitment mahitungod sa gugma. Linghod pa kaayo ang iyang panghunahuna ug anaa pa niini ang pagkabata-bataon.
Busa dapat lang usab nga dili pa nimo kini problemahon. Mas maayo nga matagbaw una siya sa barkada ug dili siya mapugos og kaseryoso sa iyang relasyon kay kun kamo man ang magkadayon at least matagbaw na siya sa kinabuhing batan-on kay kon dili mabalik ra gihapon kini sa iyang kinabuhi.
Pasagdi lamang siya nga maglingaw-lingaw ug ayaw usa seryosoha ang imong gugma. Kay bata ka pa usab alang niining butanga. Hinuon, hatagi og higayon ang inyong kaugalingon samtang mga bata pa kamong duha. Ug ayaw unaya og gapos ang inyong mga kamot ug tiil nga maglisod na hinuon mog lihok tungod kay seryoso na mo sa inyong gugma. -- Tita Salie