Dear Tita Salie,
Have a wonderful day. Just call me Cathy taga Tanjay, Negros, Usa ka dalaga ug dunay uyab.
Ang akong problema bahin sa lalaki nga akong gihigugma. Duna man god siya’y anak apan dili pa siya minyo kay wala man gyod siya nakasal sa inahan sa iyang anak.
Matud sa akong suod nga higala dili kuno kasaligan ang akong uyab, mao usab kini ang gisulti sa akong ig-agaw. Unya nasayod na baya ang akong mga ginikanan bahin sa among sitwasyon sa akong uyab. Magteksanay pa man gani ang akong mama ug akong boyfriend. Sa akong tan-aw mora og naghinay-hinay og build og usa ka maayong relationship ang akong uyab ngadto sa akong pamilya.
Buotan kaayo kining akong uyab, Tita. Unya kun duna ko’y mga problema anaa gyod kini siya alang sa pagtabang nako. Tungod niining tanan nga iyang gipakita nahigugma gyod ko pag-ayo kaniya. Siya na gyod ang lalaki nga akong gipaabot nga akong minyoan.
Apan naglibog man god ko, Tita, tungod sa gisulti sa akong amiga ug ig-agaw nga dili kuno kasaligan kining tawhana. Hinungdan nga nagduhaduha na pod hinuon ko sa akong hunahuna. Unsa kahay akong buhaton? Palihog pasabta ko. Thank you very much and more power.
* * *
Dear Cathy,
Mas maayo siguro kun imong sutaon kun nganong nakasulti ang imong amiga ug ang imong ig-agaw nga dili kasaligan ang maong lalaki. Unsa may ilang basihan sa ilang pagsulti niini. Kay dili man usab maayo kun mohukom ka lang nga imong bulagan ang imong uyab sa walay lig-on nga hinungdan kondili ang ila lamang estorya. Dili usab maayo nga imo lang baliwalaon ang ilang estorya kay tingali kun tinuod gyod nga dili siya kasaligan. Tingali kun nagkuyog kamong duha apan atoa kini nagsige og pasiplat sa imong amiga o kaha sa imong ig-agaw hinungdan nga nakasulti sila niini. Posible usab nga ila kining nakit-an nga nikiringking sa ubang babaye.
Kay alang kanako, dili tanang lalaki ang makigsuod, o makigteksanay sa inahan sa ilang uyab. Maikog na siguro ang lalaki nga magbinuang pa sa ilang hinigugma kun siya suod na sa pamilya sa iyang uyab. Kana kay nag build-up na siya ug maayong relasyon sa imong ginikanan anaa na niana ang seryoso nga panghunahuna ug kaseryoso sa iyang tinguha diha kanimo. Apan kinsay nasayod kun iyaha lamang kining istelo aron imong ihatag ang kompyansa kaniya? Busa, ang labing maayo nimong buhaton susiha kun nganong nakasulti sila sa ingon aron wala kay mahayan sa kauwahian. -- Tita Salie