‘45 Minutes’

Gula 6

“Biliba g’yud nako niining imong asawa bai Tiago kay pinangga ka g’yud kaayo kay giapas ka na dinhi sa tindahan,” gibulatikan ni Berting ang iyang higala nga wala g’yud intawo’y kalibutan nga ang iyang asawa gi-esmerenghoy ni Berting kaganinang kaadlawon.

“Giapas tawon nako ning akong bana Berting kay para makakaon na ug moabtik na kini sama nimo,” dali nga nakatubag si Liza nga nakapakulba ni Berting kay basin og makasabot si Tiago nga nagka-esmerenghoy sila ug ang iyang asawa.

Wala masayop si Berting kay mi-react g’yud dayon si Tiago. “Nganong nakaingon ka man nga abtik pareho ni Berting, nakasuway ka?” matud ni Tiago ngadto sa iyang asawa nga may kapintok gamay ang tono sa iyang tingog.

Apan abtik usab kaayo nga nakatubag si Liza nga mikulismaot ang nawong. “Hubog ka na g’yud diay gabii. Nahinumdom ka nga gisungog ka nilang Berting gabii nga kun makalahutay ka lang og pipila ka minutos dili sama niya nga moabut og 45 minutes?”

Wala na motingog si Tiago. Taud-taud.“Bitaw, pag-una lang og uli Liz kay moapas ra ko nimo dayon. May estoryahan lang mi gamay og si Berting,” giingnan ni Tiago ang iyang asawa. Mibiya tuod si Liza apan nakamaneho pa gayud kini sa pagkihat kang Berting nga wala makakita si Tiago.

“Buanga bitaw nako bai Berting, tinuod kadtong gisulti ni Liza nga dili ko makalahutay’g dugay kun makigkumbati ko kaniya sa kama,” daw nangumpisal si Tiago sa iyang higala. “Gusto ka ba nga hatagan nako’g anting-anting?” gisukna ni Berting ang higala.

Gitug-anan ni Berting si Tiago nga kuwang siya’g lahutay apan masulbad ra kini dayon kun imnon niya ang iyang ihatag. “Daghan na ko og natabangan ug wala gayud magmahay, pulos sila nagpasalamat nako bai Tiago,” ni Berting pa.

Nakakita’g paagi si Berting. “Maghuwat ka lang sa balay nimo bai, ug ang imong asawa maoy mokuha sa ihatag nako nimo nga anting-anting. Imna kini nga dili masayud si Liza mga usa ka oras sa dili pa ang kumbati. Ipakuha ni Liza adto sa balay tukma gayud nga udtong tutok.”

May plano si Berting nga hatagan niya’g tambal nga mainum si Tiago nga makatabang pagsulbad sa iyang problema, apan aduna usa’y pakapin nga bugti niini. “Sigi bai Bert, ipakuha nako ni Liza didto sa imong balay,” ni Tiago pa.

“Oki apan malangan lang og gamay kay atubangan sa asawa sa akong tabangan, ako pa nga orasyonan ang maong tambal bai.

Huwata lang si Liza nga mabalik sa inyo apan sigurado nga epektibo kaayo ni ug malingaw na g’yud nimo ang imong asawa,” matud ni Berting. – Sumpayan