Text

Sabado, samtang nagkalingaw sila si Aldong ug mga higala nga sila si Jojo, Ablit, Cyril ug Boboy sa ilang pagtagay sa Black Label nga ilimnon nga hinatag ni Frank kalit lang mitingog ang cellphone
ni Aldong uyon sa huni nga Suroy-Suroy sa Missing Felimon.

Nabasa niya ang mensahe: “Eat your dinner na, take good care of yourself, I mean it!”

Gibati og kahikurat si Aldong sanglit dili niya sinati ang maong numero. Kinsa man kaha ni siya? Maoy naa sa iyang hunahuna kini tungod kay wala man ma-register ang maong numero sa iyang cellphone.

Ang bugtong nakarehistro ra gyud mao ang numero sa iyang mga suod nga mga higala ug kang Honey Ko nga iyang pinangga. Iyang gihimo ang pag-reply: “Hu u?” Apan walay tubag gikan sa misteryosong texter. Mao nga wala niya hatagi og igong pagtagad ang maong texter.

Human sa ilang kukabildo nipauli siya aron matulog. Apan matungang gabii na lang, padayon nga ningaab ang iyang cellphone sa sunod-sunod nga text uban ang mga love quotes sa maong texter.

Nanglabay ang mga adlaw ug bulan padayon siyang gihasol ning maong texter. Nagkadugay, nahimong provocative ang text messages niini ngadto kaniya.

“Dai, please ko hipos sa ako nga undies kay ulan ra ba!”” Gibalik ni Aldong ang text message ngadto sa maong texter nga abtik usab nga ni-reply: “Sori, wrong sent me. Hehehe!”

Si Aldong ni-reply “dili ko nimo kun kinsa ka man oi! Kaluod ba nimo!”

Ang maong texter nagkanayon: “Y man jud nga dili u nako nga humot man ko from the top below?” Pastilan! Nabuang na gyud ni siya.

Usa ka hapon niana samtang naglakaw si Aldong aron mopalit og bugas alang sa ilang panihapon ni Honey Ko iyang pinangga, iyang gikabalag ang texter  nga nagsamok kaniya. Usa ka  aresgada ug “kapalmuks” nga babaye kang kansang dagway lagom, mata nga nagsiga, make up nga pwerting bagaa, ngabil nga pwerting pulaha, manicure nga maroon, lubot nga sapyot, daw tambaluslos nga Eba.

Niduol kini kaniya nga nagkanayon: “Do I look great with my outfit?” Si Aldong dungan ang pagngislo ang nagkanayon: “In your dreams!” nibiya siya sa maong texter. Nadunggan kini niya nga nagpanawag pa kaniya: “Pwedeng mag talk ta please?”

“Yuck! Bugtong nasinggit ni Aldong. Nahipatik sa iyang handurawan si Honey Ko iyang  pinangga. Nagkanayon si Aldong: “Bahala na! dili gyud nako pulihan ang akong asawa nga maanyag, buotan pa!” nagdali siyang nipauli aron makahikay na sa ilang  panihapon. Samtang nadungog pa niya ang tingog sa usa ka bata: “Ma, ang bayad kuno sa uling ma?” (Kataposan)