Gipasabot ni Mr. Hedalgo ang iyang ig-agaw nga si Daniel nga aduna lang sila’y mahinungdanong atimanon dinhi sa Manila. Ug samtang dili pa matapos ang ilang appointment, mo-istar una sila sa balay niini. Misanong si Daniel sa dakoan uyamot nga pag-uyon ug kahinangop.
Gilihok gilayon nila ni Victor ug Vanessa ang ilang tuyo sa pag-ari sa Manila. Nakigkita sila kang Doktora Arlin Ramos, higalang mananambal ni Mr. Hedalgo.
Usa ka masuhiron nga eksaminasyon ang gipahigayon ni Doktora Ramos ngadto kang Vanessa. Gikuhaan siya’g dugo, ug uban pang mga gikinahanglan aron mailhan kun unsay iyang sakit nga maoy hinungdan sa inanay nga pagpangluya sa iyang lawas.
Human ma-examine si Vanessa ni Doktora Ramos, kinahanglang magpabilin pa sila sa balay sa ilang paryente sa Sampaloc og pipila ka adlaw aron paghulat sa resulta sa gihimong eksaminasyon niini kang Vanessa. Makuti ang proseso niini aron gayod maseguro nga dili sayop ang ihatag nga resulta sa paghiling niini kaniya.
Mipailob si Vanessa. Nakasabot siya sa tumong sa doktora nga friend sa iyang amahan. Nasayod siya nga alang sa iyang kaayohan ang tumong sa doktora, ug dili dapat dali-dalion.
Busa mapailobon nga nagpaabot si Vanessa ug ang iyang amahan sa resulta sa examination nga gihimo ni Doktora Arlin Ramos sa babaye. -- Sumpayan pa